Li salona Ramada ya li Silêmaniyê ji aliyê Navenda Lêkolînên Şar a ser bi dezgeha medyayî ya Şarpress ve, foruma ‘Piştî salek pêvajoya aştiyê ya li Tirkiyeyê ber bi kuve diçe?’ destpê kir. Di forûmê de 120 kesayetên welatparêz, azadîxwaz, rojnamevan û çalakvan amadene. Forûm bi deqeyek rêzgirtina ji bo şehîdan destpê kir.
Destpêkê Rêveberê Navenda Lêkolînan a Şarpress’ê Hawkar Îzet axaftinek kir û got: “Ev saleke pêngavên ji bo demek nû ya giftûgoyan di navbera dewleta Tirk û Kurdan de destpê kiriye. Aliyê Kurd (PKK) li ser bang û daxwaza birêz Ocalan hinek gavên erênî avêtiye. Lê heta niha desthilata Tirkiye ji bilî gotinî, ti pêngavek pratîkî neavêtiye. Bi taybetî jî di warê yasayî, bicihanîna mafê hêviyê û berdana siyasetmedarên Kurd ên ku li dervey pîvanan di girtîgehên Tirkiye de ne. Lê hîna hewldan berdewamin, pêngavên ji bo giftûgoyê berdewamin û hêviya pêşketina pêvajoyê ger kêm jî be heye.”
Wê di forûmê de du panel werin dayîn. Di panela yekem de wê Parlementera DEM Partî ya Şirnexê Newroz Uysal û Wasiyê Rêber Apo û Parêzerê Buroya Sedsalê Mazlum Dînç û Endamê Rêxistina CPT Kameran Osman amade bin. Wê panel ji aliyê nivîskar û çavdêrê siyasî Dr. Cehfer Elî ve bê birêvebirin.
Wê panela duyem jî Mamostaya Zanîngehê Dr. Telar Elî, Lêkolîner û Mamostayê Zanîngehê Dr. Selam Ebdulkerîm û Nûnerê Rêveberiya Xweser a Bakur û Rojhilatê Sûriyeyê ya li Herêma Kurdistanê Mihemed Ala tevlî bibin. Wê panel ji aliyê rojnamevan û çavdêrê siyasî Hîwa Seyîd Selîm ve bê birêvebirin.
Forûm dê rojekê berdewam bike, piştre jî Parlementera DEM Partî ya Şirnexê Newroz Uysal û Wasiyê Rêber Apo û Parêzerê Buroya Sedsalê Mazlum Dînç wê bi civînek çapemeniyê li ser geşedanên dawî yên girêdayî pêvajoyê agahiyan parve bikin.
