ÎHD’ê: Li Tirkiyeyê di sala 2024’an de herî kêm 6 hezar û 94 binpêkirina maf pêk hatine

Navenda Dokumentasyona Komeleya Mafên Mirovan (ÎHD) di “Rapora Binpêkirinên Mafê Jiyanê ya 2024’an” de binpêkirinên mafên mirovan ên cidî di gelek kategoriyan de eşkere kir, di nav de pevçûn, kuştinên li cihê kar, xemsariya dewletê, şîdeta li ser bingeha zayendî û cudakarî.
Li gorî raporê, di sala 2024’an de 3 hezar 262 kes ku di nav de 10 sivîl in, di operasyon û pevçûnên leşkerî de jiyana xwe ji dest dane.
Di encama binpêkirinên ji ber çekên ku ji aliyê polîs, cenderme û karmendên ewlehiya taybet ve hatine bikar anîn 9 kes hatin kuştin û 18 kes jî di encama êrîşên cerdevanan de birîndar bûn.
Li gorî raporê:
Herî kêm 15 penaber li ser sînor û rêyên koçberiyê jiyana xwe ji dest dane. 3 kes di binçavan de jiyana xwe ji dest dane û 27 kes jî di girtîgehan de an jî piştî serbestberdanê di dema dermankirinê de jiyana xwe ji dest dane.
Di sala 2024’an de 16 êrîşên kiryar nediyar hatine tesbîtkirin û di encama van êrîşan de 4 kes jiyana xwe ji dest dane û 9 kes jî birîndar bûne.
7 buroyên partiyên siyasî û 2 jî ya rojnameyan bûne hedefa êrîşan.
128 kes (12 ji wan zarok) ji ber xeletî an xemsariya dewletê jiyana xwe ji dest dan.
Di 106 êrîşên bi gotinên nefretê yên ku di çapemeniyê de hatine weşandin 14 kes mirin. Herî kêm 38 ji van êrîşan li dijî Kurdan bûn.
103 zarok ji ber binpêkirinên mafê jiyanê jiyana xwe ji dest dan.
Di raporê de 378 kuştinên jinan û 1897 mirina karkeran hatine tomar kirin. 71 zarok, 94 penaber û herî kêm 64 kurye motorsîkletan di qezayên kar de jiyana xwe ji dest dan.
2651 kes (di nav de 27 zarok û 46 rojnamevan) di xwepêşandanên aştiyane de hatin binçavkirin û rastî muameleyên xirab hatin. Di Cejna Newrozê de 613, di 1’ê Gulanê de 268 û di çalakiyên Meha Rumetê de 23 kes hatine binçavkirin.