10’emîn salvegera rizgarkirina Şengalê bi pêşengtiya Rêveberiya Xweser û Tevgera Azadiya Jinên Êzidî (TAJÊ) li navenda Şengalê bi coşek mezin hat pîrozkirin. Bi sedan kes tevli şahiyê bû. Şahiya rizgarkirina ji bo ruhê şehîdên Şengalê bi deqeyeke rêzgirtinê destpê kir.
Piştre axaftina destpêkê ji aliyê endama Koordînasyona Tevgera Azadiya Jinên Êzidî (TAJÊ) Neam Bedel ve hat kirin.
Neam Bedel, di serî de bi xêr hatina tevahî mêvanan kir û roja rizgarkirina Şengalê ji Rêber APO û li tevahiya gerîlayan pîroz kir.
‘ŞENGAL, ŞENGALA ŞEHÎDAN E’
Neam Bedel di destpêka axaftina xwe de roja rizgarkirina Şengalê li Rêber Apo, gerîlayên azadiyê û şehîdan pîroz kir û wiha got: “Her roj aliyên ku Şengal bi tenê hiştin û neparastin dibêjîn Şengal Şengala me ye û em ê dîsa vegerîn Şengalê. Lê em dibêjin pêwîstiya Şengalê bi kesên wiha nîne. Şengal a Şengaliyan e, yê şehîdan e, yê welatparêzan e, yê berxwedêran e, Mam Zekiyan û Dijwaran e. Em wekî TAJÊ heta dawiyê li pey şervanên xwe ne û li pey doza xwe ne. Divê careke din Şengal nebe wek beriya 2014’an û em ê nehêlin bibe jî. Şengala ku di 2014’an de hat wêrankirin, di sala 2015’an de bi saya şervanên berxwedêr bû cihê şahiyê. Em careke din vê rojê li şehîdan û hemû gelê xwe pîroz dikin.”
‘BERXWEDAN, ŞENGALÊ BI TEVAHIYA CÎHANÊ DA NASÎN’
Ji fermandariya YBŞ’ê Zekî Şengalî jî ev axaftin kir: “Em 10’emîn salvegera rizgarkirina Şengalê li Serok Apo, şervanên azadiyê, gerîlayên azadiya Kurdistanê, gelê xwe û hemû şehîdan pîroz dikin û hemû şehîdên ku li ber Şengalê canê xwe dane, bi bîr tînin. Em dixwazin vê bêjin, berxwedana Şengalê bi têkoşîn û qehramaniya xwe li cîhanê hat naskirin. Xwe li ser fikir û felsefeya Rêber Apo birêxistin kir, li ser Êzdatî û çanda xwe li ber xwe da. Me di oxira Şengalê de gelek berdêl û şehîd da. Îro civak li dor şehîdan kom bûye û dê xeta ku şehîdan bi xwîna xwe avakirina her bidome. Gelê me heta roja îro kedek mezin da. Em wek YBŞ’ê hêza esasî ya Şengalê ne, tu hêz bêyî ku me berçav negire nikare gavek jî biavêje. Ji ber ku em hêza esasî ya vê civakê ne. Em ji bo parastina gelê xwe amade ne ku canê xwe bidin. Em ê hêza xwe hîn xurtir bikin. Em careke din hevalên gerîla ku ji bo rizgarkirina Şengalê hatin û canê xwe feda kirin û hemû şehîdan bi bîr tînin û bejna xwe li ber wan ditewînin.”
