Navenda Ragihandina Hêzên Sûriya Demokratîk (QSD) bi daxuyaniyekê diyar kir ku Meclisa Sûriya Demokratîk (MSD), Rêveberiya Xweseriya Demokratîk a Herêma Bakur û Rojhilatê Sûriyeyê û QSDˊê li hev civiyan. Di civînê de Fermandarê Giştî Mazlûm Ebdî, endama Fermandariya Giştî Rohilat Efrîn, fermandar û nûnerên ji hêzan, Rêveberiya Xweseriya Demokratîk û MSDˊê amade bûn.
Di civînê de behsa rêveçûna dan û standinên bi hikumeta veguhêz a Sûriyeyê û mekanîzmayên bicihanîna peymana 10ˊê Adarê hate kirin.
Beşdaran gavên di vî warî de hatine avêtin pêşkêş kirin, girîngî da berdewamkirina vê lihevkirinê û Şamê ji bo xwedîderketina li diyalogê weke vebijêrka neteweyî ya çareserkirina dozên asê ne were teşwîqkirin.
Di civînê de hate diyarkirin ku QSDˊê bi diyaloga neteweyî ku rêya herî serkeftî ya pêkanîna aştî û îstîqrarê li ser xaka Sûriyeyê ye, girêdayî ye.
Beşdaran encamên civîna Washingtonê ya di navbera serokê Amerîkayê Donal Trump û serokê hikumeta veguhêz Ehmed El Şeri de pêk hatiye pêşwazî kirin û diyar kir ku rawestandina cezayan û vekirina kanalên hevkariya dîplomasî “guherînek erênî ber bi destekdayîna çareya siyasî ya berfireh bi beşdariya tevahî Sûriyeyiyan nîşan dide.”
Di civînê de pesna tevlêbûna Sûriyeyê li Koalîsyona Navneteweyî ya Têkoşîna dijî Terorê hat dayîn û hat destnîşankirin ku QSDˊê berê jî û niha jî, ji 10 salan ve, stûna bingehîn a vê koalîsyonê ye.
Beşdaran dozên hundirîn û xizmetguzarî nîqaş kirin û got pêwîstî bi başkirina asta xizmetguzariyan û pêşxistina performansa saziyên sivîl li herêmên Bakur û Rojhilatê Sûriyeyê heye.
Civîn bi girîngîdayîna yekitiya vîzyon û berpirsiyariyê di nava Sûriyeyiyan bi tevahî pêkhateyên wê de heye.
