Bi dirûşma “Zanîn Hunera Azadiyê ye” Zanîngeha Rojava şahiya derçûna 211 xwendekarên beşên cuda yên zanîngehê, merasîma derçûnê li dar xist. Mrasîm li Parka Azadî ya bajarê Qamişlo hat lidarxistin.
Şêniyên herêmên cuda ên Bakur û Rojhilatê Sûriyeyê, Hevserokên Meclîsa Rêveber a Rêveberiya Xweser a Bakur û Rojhilatê Sûriyeyê, Evîn Siwêd û Husên Osman, şandeyek ji Rêveberiya Xweser a Demokratîk a Kantona Cezîrê, nûnerên partiyên siyasî, û gelek meclis, rêxistin û yakîtiyan tev li merasîmê bûn.
Piştî deqeyek rêzgirtinê, hevseroka Zanîngeha Rojava Zêna Elî, bi xêrhatina beşdaran kir û serbilindiya xwe bi xwendekarên derçûyî anî ziman û got, “Em sala 2016`an bînin bira xwe, dema ku zanîngeh vebû, me bi zehmetiyên mezin, bi çavkaniyên lawaz, hejmareke kêm a xwendekar û mamosteyan, dest pê kir. Lêbelê, van zehmetiyan berdewamiya me biryardariya me kêm nekir.”
Hevserokê Meclisên Zanîngehan li Bakur û Rojhilatê Sûriyeyê Xelîl Elî, xwendekarên derçûyî pîroz kir û destnîşan kir ku zanîngeh ji nava şer çêbûye. Her wiha hêviya xwe anî ziman ku xwendekar dê bi bandor beşdarî avakirina civakê bibin.
Hevserokê Meclisa Rêveber a Rêveberiya Xweser a Bakur û Rojhilatê Sûriyeyê, Husêyn Osman diyar kir ku xwendekar avakerên siberojê û kevirê bingehîn ê pêşketina civakê ne. Osman ji xwendekaran xwest ku xizmeta civak û welatê xwe bikin, ku pir hewcedarê jêhatîyên wan e.
Hevserokê Meclîsa Rêveber a Kantona Cezîrê Hesen Şero jî di axaftina xwe de ji xwendekaran xwest ku xizmeta civakê bikin û siberoja neteweyê ava bikin.
Piştî axaftinan, şandeyek ji Rêveberiya Xweser, rêveber û mamosteyên Zanîngeha Rojava, derket ser dikê û xwendekar pîroz kirin û bawername radestî wan kir.
