Li bajarên Dirbêsiyê, Til Temir, Hesekê, Girkê Legê û Dêrikê yên kantona Cizîrê pîrozbahiyê 27’ê Mijdarê salvegera 47’emîn a damezirandina Partiya Karkerên Kurdistanê (Cejna Berxwedana Neteweyî) hatin lidarxistin.
DIRBÊSIYÊ
Şêniyên bajarê Dirbêsiyê yê kantona Cizîrê bi coşeke mezin Cejna Berxwedana Neteweyî pîroz kir. Pîrozbahî li Parka Şehîd Zevîn bi deqeyeke rêzgirtin dest pê kir. Piştre endamê Meclisa Giştî ya Partiya Yekitiya Demokratîk (PYD) ya kantona Cizîrê Ebdulxenî Oso axivî. Oso îşaret pê kir ku PKK’ê ji bo gelê Kurd têkoşîneke bê hempa kir û Banga Aştî û Civaka Demokratîk a ji aliyê Rêber Apo ve hatiye kirin jî ji bo tevahiya Rojhilata Navîn e.
Şahî bi stranên şoreşgerî û gerandina xelkên govendê bi dawî bû.
TIL TEMIR
Şêniyên bajarên Til Temir û Zirganê yên kantona Cizîrê jî 27’ê Mijdarê Cejna Berxwedana Neteweyî li qada Newrozê ya naverasta bajarê Til Temirê pîroz kir. Piştî rêzgirtinê hevserokê Meclisa Malbatên Şehîdan a Til Temir Çinar Yûsif axivî û destnîşan kir ku felsefeya neteweya demokratîk wekî proje li herêmê hatiye rûniştandin.
Ji rêveberên Hêzên Parastina Civakî yên Til Temirê (HPC) Mihemed El Salim jî got, avabûna PKK’ê xaleke veguherînê di dîroka gelan de ye.
Di dawiyê de stran hatin gotin û govend li ber hatin gerandin
GIRKÊ LEGÊ
Li bajarê Girkê Legê yê kantona Cizîrê jî bi heman boneyê şahiyek hat lidarxistin. Şahî li hola Roj bi beşdariya bi sedan şêniyên bajarên Girkê Legê û Rimêlanê û gundewarên wan pêk hat. Di şahiya ku bi rêzgirtinê dest pê kir de axaftin hatin kirin. Di axaftinan de Roja Berxwedana Neteweyî hat pîrozkirin û hate gotin, destkeftiyên hatine bidestxistin berhema keda şehîdan e. Her wiha soza domandina têkoşînê hate dayîn.
Di dawiyê de hunermend û komên stranan daketin ser dikê û stran pêşkêş kirin. Girse jî li ber stranan govend gerandin.
HESEKÊ
Tevî nûnerên saziyên sivîl û leşkerî, pêkhateyên bajarê Hesekê jî 27’ê Mijdarê Cejna Berxwedana Neteweyî pîroz kir.Pîrozbahî li Parka 4’ê Nîsanê bi deqeyeke rêzgirtin dest pê kir. Ji rêveberên Meclisa Bajarê Hesekê Kilara Reqa axivî û got, Rêber Apo li dijî hewldanên tunekirina doza Kurd şoreşek dabû destpêkirin ku bi mîlyonan kes li cîhanê tev lê bûne.
Şahî bi stran, gerandina xelekên govendê û dirûşmên silavkirina Rêber Apo bi dawî bû.
DÊRIK
PYD’ê bi hevkariya Navenda Çand û Hunerê ya Dîcle ya Dêrikê jî şahiyek li dar xist. Şahî bi deqeyek rêzgirtin dest pê kir û li ser navê Meclisa Malbatên Şehîdan û PYD’ê axaftin hatin kirin. Di axaftinan de têkoşîna PKK’ê ya bo doza gelan hat vegot û hate diyarkirin ku Rêber Apo banga aştî, rûmet û azadiya tevahî mirovahiyê dike.
Di dawiyê de komên hunerî stran gotin û beşdaran li ser govend gerandin.
