Di daxuyaniya fermî ya 29’ê Mijdarê de hat diyarkirin ku Trump hewl dide mudaxileyî desthilatdariya neteweyî ya Venezuelayê, ewlehiya wê ya hewayî û xaka wê bike. Venezuela ragihand ku gefên wiha bi eşkere madeya 2(4). a ku bikaranîna hêzê ya Şertê NY’ê qedexe dike, binpê dike.
Hikûmeta Venezuela daxuyaniya Trump weke “gefeke mêtinger û êrîşeke derqanûnî û neheq” pênase kir.
Piştî banga Trump a li ser hesabê X’ê di qada hewayî ya herêmî de nediyarî çêbû. Wezareta Parastinê ya Trinidad û Tobago ragihand ku li qadên wan ên hewayî ti astengî nînin û gotinên li ser medyaya dîjîtal weke “agahiya şaş û hewldana çêkirina fikarê” pênase kir.
Her wiha hin rêyên hewayî piştî hişyariyên “liv û tevgerên leşkerî” ya li herêmê zêde dibin, firînên Venezuelayê rawestandibûn. DYE jî ev liv û tevgera leşkerî bi hinceta “têkoşîna li dijî narko-terorê” diparêze.
Nicolas Maduro jî di daxuyaniya xwe de diyar kir ku desthilatdariya welatê wî li hemberî ti gefa hêzên derve serî natewîne û got, “Tenê saziyên Venezuelayê dikarin têkildarî qada me ya hewayî biryar bidin.”
