Duh êvarî Hêzên Parêzvanên Nîştimanî yên Siwêdayê operasyoneke berfireh a ewlehiyê pêk anî. Piştre 5 kes destgîr kirin û li ser rêyên sereke jî tedbîrên parastinê asê kirine. Nûçegihanê me ragihand ku ji kesên hatin destgîrkirin Raîd El Metnî û Asim Ebû Fexir in û ev agahî dan ” Raîd El Metnî yek ji fermendarên Meclisa Leşkerî ya Siwêdayê bû ku piştî rûxandina rejîma berê hatibû avakirin. Piştî ku rola meclisê di mehên dawîn de paşde ket, tev li Hêzên Parêzvanên Nîştimanî bûbû.”
Hêzên Parêzvanên Nîştimanî di saetên şevê de li bajarokê Etîl bi ser mala kesê bi navê Mahir Felhût ê ku nêzî El Metnî ye de girt, Felhût di serdegirtinê de xwe radest kir.
Li gorî çavkaniyên nêzî Hêzên Parêzvanên Nîştimanî yên Siwêdayê, di operasyonê de malên kesên têkiliyên wan bi hêzên hikumeta veguhêz re hene hatin serdegirtin.
Hêzên Parêzvanên Nîştimanî der barê mijarê de daxuyaniyek weşand.
Hêzên Parêzvanên Nîştimanî bûyera rû daye bi “Komployeke kirêt û xiyaneteke mezin” bi nav kir û got: ” komek xayîn û ajan bi derdêla pereyan û bi hevkariya hikûmeta veguhêz a Sûriyeyê û aliyên derve xwestin binpêkirineke ewlehiyê ya xeternak pêk bînin û rê li ber êrişeke li dijî sivîlan vebikin.”
Di dewama daxuyaniyê de hate gotin, “têlên komployê bi tevahî aşkera bû. Kesên destên wan di vî kiryarê de hene keşif bûn, li ser vê yekê operasyoneke ewlehiyê ya bi baldarî û bi lezî pêk hat. Di encamê de xayîn û komploger hatin girtin û sewqî dadgehê hatin kirin.”
Li gorî çavkaniyên nêzî Hêzên Parêzvanên Siwêdayê û Serokatiya Rûnahî, kesê bi navê Xandî Ebû Fexir û koma wî, bi hevkariya Silêman Ebdulbaqî hewl dan bi ser avahiya Seraya û Rêveberiya Polîsan de bigirin da ku derbeyekê li dijî Şêx El Hicîr pêk bînin.
Çavkaniyan dane zanîn ku hewldana wan a ketina her du avahiyan têk çûn û ev agahî pare kirin ” Parêzvanên Nîştimanî yên Siwêdayê ên di avahiya Serayayê de mudaxele kirin û heya kolana navendî da pey êrişkdaran. Di encamê de hin êrişkarr hatin girtin.”
Çavkaniyan destnîşan kir ku eger rewş zû nehatiba kontrokirin dê komkujî li bajar çêbiba.
Hêzên Parêzvanên Nîştimanî yên Siwêdayê di daxuyaniyek din de ragihand di dema operasyona de wan 2 kesên din destgîr kirine ku dîsîplîna leşkerî binpê kirine û aşkera kir ku dê lêprsîn li gorî qanûnê pêk werin.
Her wiha da zanîn ku koma hat destgîrkirin plan dikir ku rewşeke mîna ya Tîrmeha borî careke din derxin.
Ji berbanga vê sibehê hişyariyeke ewlehiyê li bajarê Siwêdayê heye û her deverê tedbîrên parastinê hatine asêkirin.
