Li bajarê Kerkûk şîn ji bo Îrfan Bahadîn ku duh ji ber gule reşandina hêzên ser bi PDK’ê ve ya li gundê Lacan ser bi sînorê bajarokê Guwêr ya ser bi Hewlêrê, di dema xwepêşandana li dijî bîra Lanaz ya Malbata Barzanî de hatibû kuştin, hate danîn.
Di şînê de bavê Îrfan Bahadîn Berzencî daxuyaniye da çapemeniyê û helwesta xwe nîşan da.
Bahadîn Berzencî diyar kir ku kurê wî ajokarê wesayîta barhilgire amûran ji bo projeyên nava Hewlêrê dibe û got: “Dema kurê min gihişte cihê xwepêşandanê gule hatin teqandin. Kurê min xwestiye xwe rizgar bike, li ser nîva rê bi doşkayê gule lê hatiye reşandin. Piştî şîna me xilas bû, em ê gilî bikin. Nabe xwîna kurê min vala biçe.”
Bahadîn Berzencî destnîşan kir ku ew kujeran dinasin û got: “Du belgeyên bi dîmen li gel min hene ku çawa hêzên navxwe yên wê sînorê bi doşkayê gule li kurê min reşandine. Fermana gule reşandinê li kurê min hatiye kirin ku kurê min ne terorîste, ne jî xwepêşander bû. Min li saziya tiba edlî ya nexweşxaneyê cenazeyê kurê xwe girtiye, gule ji pêş ve li serî ketiye û li pişte re derketiye. Kurê min xwedî malbate û zarokek wan nû çêbûye. Di xaniyê kire de dijî û deyndare.”
