Baskê Meşa Budçeyê Ji Bo Nan û Aşitiyê ya ku ji çar aliyan ve ji aliyê Partiya Wekhevî û Demokrasiyê ya Gelan (DEM Partî) ve ji bo balê bikişîne ser xizanî û krîza aborî li dijî budçeya sala 2026’an a ku li Meclisê tê gotûbêjkirin, gihişt Rihayê. Meşvan li ber Deriyê Wêranşarê ji aliyê Platforma Saziyên Demokratîk a Rihayê ve bi govend û erbaneyan hatin pêşwazîkirin.
Piştî pêşwaziyê, Endama MYK’ê ya DEM Partiyê İlknur Birol û Parlamenterê DEM Partiyê yê Colemêrgê Vezir Çoşkun Parlak li ser navê girseyê daxuyanî dan. Di axaftinan de hat destnîşankirin ku budçeya sala 2026’an a hikûmetê “bi bijardeyên alîgirê şer û sermayedar hatiye amadekirin.”
‘BUDÇE JI BO ŞER, TANK Û TOPAN TÊ HERIKANDIN’
Îlknur Birol diyar kir ku ew ji bo daxwazên rast ên gel ragihînin derketine rê û anî ziman ku budçe ji hewcedariyên civakî dûr e. Birol da zanîn ku budçeya sala 2026’an “ji bo komek sermayedar, pîşesaziya parastinê û polîtîkayên şer çavkaniyan vediqetîne.”
Îlknur Birol wiha got: “Em li budçeyê dinêrin, ‘gelo aşitî tê de heye, wekheviya jinan tê de heye, siberojek ewle ji bo zarokan tê de heye?’ Lê em dibînin ku demeke dirêj e bijardeyên siyasî dahata civakê ji komanên sermayeyê re herikîne. Xwarina rojekê ya zarokan, stargeha ciwanan, mûçeyê teqawîdan di vê budçeyê de tune ye.”
‘EM Ê DAXWAZAN BI ÇUVALAN BIGIHÎNIN PARLAMENÊ’
Îlknur Birol anî ziman ku armanca meşê ew e ku gotina gel bigihîne Enqereyê û eşkere kir ku heyetên ji çar aliyan ve hatine wê roja yekşemê daxwazên nivîskî radestî parlamenê bikin. Îlknur Birol got, “Em ê nameyan çuval çuval bibin parlamenê. Dema ku budçe tê gotûbêjkirin, em ê gotina gel bînin ser kursiyê. Têkoşîna me wê dewam bike.”
‘BI MILYONAN KES JI VÊ BUDÇEYÊ MEZINTIR IN’
Parlamenter Vezir Çoşkun Parlak di axaftina xwe de gotina Serokomar Erdogan a “Dinya ji 5’an mezintir e” bi bîr xist û got, “Bi milyonan mirov ji vê budçeyê mezintir in.”
Parlak destnîşan kir ku budçeya Tirkiyeyê esasen li ser polîtîkayên şer hatiye avakirin û got, “Heta pirsgirêka Kurd neyê çareserkirin, pirsgirêka demokrasî jî nayê çareserkirin. Ciwan mehkûmî rêyên koçberiyê dibin; sedema vê jî polîtîkayên têne şopandin e.”
‘DIVÊ MÛÇEYA KÊMTIRÎN HERÎ KÊM 45 HEZAR LÎRE BE’
Parlak anî ziman ku krîza aborî rasterast bi pêvajoya aştiyê ve girêdayî ye û got, “Divê mûçeyê herî kêm 45 hezar lîre be, ev jî têrê nake.”
Baskê meşa DEM Partiyê sibe, wê bi Platforma Saziyên Demokratîk a Rihayê û rêxistinên kedkaran re ji Parka Alişellî ya navçeya Xelîliyê heta Meydana Topçû bimeşe. Piştre heyet wê serdana fabrîke û atolyeyên tekstîlê bike û paşê derbasî Dîlokê bibe û meşa xwe bidomîne.
