Rêxistina Heyva Sor a Rojavayê Kurdistanê alîkariya ku ji pêdiviyên rojane ne, îro gihand navçeya Çemçemal û ji aliyê Berpirsê Nivîsîngeha Silêmaniyê ya Qubad Talebanî, Eta Mihemed ve hat pêşwazîkirin û destxweşî li Heyva Sora a Rojava kir.
Nûnerê Heyva Sor a Rojavayê Kurdistanê û Nûnerê Qubad Talebanî têkildarî mijarê daxuyaniyek dan çapemeniyê û tekezî li wê yekê hate kirin ku ev pêngav erk û karekê netewî ku piştevaniyeke girînge ji bo mexdûrên lehiyên Çemçemalê.
Hate ragihandin ku alîkariyên ji aliyê Heyva Sor a Rojava gihiştine Çemçemalê piranî pêdiviyên rojane ne ji bo malbatên mexdûrên lehiyan.
Nûnerê Nivîsîngeha Silêmaniyê ya Qubat Talebanî, Eta Mihemed di daxuyaniya çapemeniyê de axivî û got; “Ez dixwazim spasiya xwişk û birayên xwe yên li Rojavayê Kurdistanê bikim ku îro bi rêya Rêxistina Heyva Sor alîkariya xwe gihandin qurbaniyên karesata Çemçemalê.
Ev helwest helwesteke netewî ye û rêz û teqdîreke mezin heq dike ku îspat dike ku li her deverê ku Kurd di tengasiyê de bin, hemû parçeyên din yên welat êşa wan hîs dikin. Çawa ku me di şoreşê û demên dijwar de piştgirî da hev, emê di qonaxa jinûve avakirinê de jî piştgirîya hev bikin.”
Her wiha Nûnerê Heyva Sor a Rojava yê Ofîsa Silêmaniyê Ferho Mihemed Emîn jî axivî û wiha got; “Em ji ber bûyera qewimî xemgînin. Wekî nûnerên Heyva Sor, em hewl didin ku pêdiviyên xelkê Çemçemalê bicîh bînin. Di demên pirsgirêkên wiha de, sînor wateya xwe winda dikin. Ji ber ku jiyan û ramana Kurd hevpar in. Lewra divê em di demeke wiha de hevkariyê bikin û çi ji destê me tê ji bo gelê xwe bikin.
Xelkê Çemçemalê gelek alîkariya me kiriye û gelek xelkê me yê Rojava li Çemçemalê bicih û xelkê Çemçemalê bi wan re gelek bûne alîkar. Em mîna malbatekê ne û erkê me ye ku em hevxemiyê nîşanî xelkê Çemçemalê bidin û alîkariyê pêşkêş bikin.”
Nûnerê Heyva Sor a Rojava amadebûna xwe anî ziman ku hêzên xwe yên li Sêmalka ji bo alîkariya xelkê Çemçemalê bişînin.
