Konseya Rêveber a Kongreya Neteweyî ya Kurdistanê (KNK) bi daxuyaniyekê ragihand ku ew bi wezîfedarkirina siyasetmedarê Kurd û Serokkomarê berê Dr. Berhem Ahmed Salih ji bo Komîseiya UNHCR’ê kêfxweş e.
Bi navê Kongreya Neteweyî ya Kurdistanê Berhem Salih hate pîrozkirin û di vê wezîfeya navneteweyî ya girîng de serketin jê re xwest. Di daxuyaniyê de hate gotin, “Bêguman ji bo her Kurdekî welatparêz cihê serbilindiyê ye ku Kurdekî dilsozê doza Kurdistanê yekemcar ji bo wezîfeyeke bi vî rengî ya navneteweyî hatiye tayinkirin.”
Di dewama daxuyaniyê de hate gotin, “Îro cîhan di pêvajoyeke nû û zehmet re derbas dibe. Ji ber şer, nearamiya siyasî, krîzên aboriyê û rêveberiyên zordar bi milyonan mirov ji cih û warê xwe bûne. Bi taybetî li nava atmosfera krîz û kaosê ya Rojhilata Navîın, li herêmên cuda yên Kurdistanê bi sed hezaran penaber û koçberên Kurd ji bo jiyanê li ber xwe didin.
Em di wê baweriyê de ne ku dilsoziya we ya bi nirxên mirovî û bi hişmendiya berpirsyariyê ya li pêşberî gelê Kurd hûn ê li vê qadê tevkariyên girîng û mayinde bikin. Baweriya me tam e ku di xurtkirina aştî û aramiya herêmên şer û başkirina mercên mirovî, kêmkirina pirsgirêkên penaber û koçberiyê hûn ê bi roleke hîn çalak rabin.”
