Desteya Rêveber a Navendî ya Partiya Herêman a Demokratîk (DBP) der barê êrişên komên girêdayî Hikûmeta Demkî ya Sûriyeyê li ser taxên Şêxmeqsûd û Eşrefiyê yên Helebê de daxuyaniyek nivîskî weşand. Di daxuyaniyê de bi sernavê “Divê êrişên li ser Şêxmeqsûd û Eşrefiyê tavilê rawestin!” hat destnîşankirin ku êriş ku ji duh ve berdewam dikin, sûcekî eşkere yê li dijî mirovahiyê ne ku sivîlan hedef digirin.
Di daxuyaniyê de wiha hat gotin: “Ev êriş ku ji aliyê komên çekdar ên girêdayî Hikûmeta Demkî ya Sûriyeyê ve bi bikaranîna tank û bombebaranên dijwar hatine kirin, bûne sedema mirina sivîlan ku zarok jî di nav wan de hene. Bi awayekî sîstematîk hedefgirtina qadên jiyanê, nîşan dide ku mafê jiyanê yê sivîlan bi zanebûnî tê binpêkirin û taxên Kurdan bi zanebûnî wekî qada şer tên veguherandin. Ev rewş nikare tenê wekî ‘pevçûnek’ leşkerî were hesibandin. Tiştê ku diqewime binpêkirineke eşkere ya mafên sivîlan û binpêkirineke eşkere ya hiqûqa mirovî ya navneteweyî ye. Bi êrişên ku heta şevê berdewam dikin, Şêx Meqsûd û Eşrefiye bi bandor hatine dorpêçkirin, rê li ber operasyoneke berfirehtir û wêranker vedike. Ev ne tesadufî ye; ew hilbijartinek bi zanebûni û plansazkirî ye ku encamên wê yên siyasî hene.”
Di berdewamiya daxuyaniyê de hat bilêvkirin ku di pêvajoyeke wiha de ku entegrasyona QSD’ê ji bo artêşa Sûriyeyê tê nîqaşkirin, pêkanîna van êrişan balkêş e û hat gotin ku tiştên diqewimin îhtimala çareseriyê sabote dikin.
Di berdewama daxuyaniyê de wiha hat gotin: “Ev êriş ne tenê bingeha heyî, her wiha hemû bingehên potansiyel ên lihevhatina siyasî ya der barê pêşeroja Sûriyeyê de jî têk dibin. Ji bo rejîma Şamê, ev bûyer xaleke werçerxê ya dîrokî di têkiliyên bi Kurdan re temsîl dikin.”
Di daxuyaniyê de bang li hêzên navneteweyî û aktören têkildar hat kirin ku ne temaşevan bin.
