Êrişên çeteyên bi piştgiirya dewleta Tirk û komên HTŞ’ê yên ser bi Serokkomarê veguhêz ê Sûriyeyê Colanî yên li ser taxên Şêxmeqsûd û Eşrefiyê yên Helebê ji aliyê rewşenbîr, nivîskar û siyasetmedarên Ewropî ve hatin şermezarkirin. Herî dawî Seroka Desteya Rêveber a Institute for Global Engagement (IGE) û ji Berdevkên Komîsyona Azadiya Olî ya Dewletên Yekbûyî yên Emerîkayê (DYE) Nadine Maenza têkildarî êrişan daxuyaniyên tund da.
Nadine Maenza ji rojnamevan Erem Kansoy re axivî û anî ziman ku divê ewlekariya herêmê bi ti awayî ji milîsên Artêşa Mîlî ya Sûriyeyê (SMO) re neyê hiştin ku Tirkiye piştgiriyê dide wan. Her wiha bang li DYE û rayedarên navneteweyî kir ku ji bo rawestandina êrişan tavilê bikevin nava liv û tevgerê.
‘NÊTEKE WAN A JI BO AGIRBESTEKE RASTEQÎN NÎNE’
Nadine Maenza agahiyên ji kesên li Helebê wergirtî parve kir û diyar kir ku topbaran û şer giran bûye, teqînan bajar hejandiye û hêzên hikumeta Sûriyeyê careke din êriş birine ser taxên Eşrefiyê û Şêxmeqsûd ku piraniya şêniyên wê Kurd in.
Nadine Maenza ragihand ku ji bilî Kurdan her wiha civakên Xiristiyan û Êzidî jî li van taxan dimînin û diyar kir ku piraniya nifûsa wê jî ew mirov in ku ji Efrînê bi zorê hatine koçberkirin. Her wiha ragihand ku xwediyê xelata Aştiyê ya Nobelê aktîvîsta Êzidî Nadia Murad diyar kiriye ku li ser medya dîjîtal bangên alîkariya lezgîn ji bo Êzidî, Xiristiyan û Kurdan têne kirin, gefeke cidî li ser van mirovan heye.
Nadine Maenza destnîşan kir ku daxuyaniya hikumeta Sûriyeyê ya weke ‘agirbestê’ ragihandiye hêvî bi xwe re aniye, lê belê rewşa li qadê berevajî vê yekê ye û got, “Li holê agirbestek rasteqîn nîne. Tişta tê xwestin, vekişîna bi temamî ya asayîşê ye ku hêza ewlekariyê ya xwecihî ye.”
Nadine Maenza got, nayê qebûlkirin ku ewlekariya herêmê radestî SMO’yê bê kirin ku Tirkiye li pişta wan e û bi bîr xist ku beşek ji van koman ew rêxistinên Îslamî yên radîkal in ku ji ber binpêkirinên mafên mirovan ketin ber pêkanînên DYE, Qraliyeta Yekbûyî û Yekîtiya Ewropayê. Her wiha destnîşan kir ku ev kom nikare ewlehiya hindikahiyên olî pêk bîne.
‘DYE Û RAYEDARÊN NAVNETEWEYÎ DIVÊ ÊRIŞAN TAVILÊ RAWESTÎNIN’
Nadine Maenza destnîşan kir ku êrişên li ser Helebê parastin nîne, tê wateya binpêkirineke giran a mafê wan mirovan ku bi zorê ji cih û warê xw ebûne û bang li rayedarên DYE û navneteweyî kir ku ji bo rawestandina êrişan û dewamkirina wezîfeya xwe ya hêzên asayîşê yên xwecihî tavilê zextê bikin.
