Dayikên Aştiyê nerazîbûn nîşanî êrîşên Hikûmeta Demkî ya Sûriyeyê ya bi desteka dewleta Tirk ên li ser taxên Helebê dan û bi daxuyaniyan bal kişandin ser jiyana hevpar û aştiyê.
Dayika Aştiyê Adalet Çay di daxuyaniya li Rihayê de axivî û got, êrîşên li ser Rojava nayên qebûlkirin, gelê Kurd zorî koçberiyê tê kirin û qadên sivîlan tên hedefgirtin.
Dayikên Aştiyê anîn ziman ku biryarên şer li Meclîsê tên dayîn û destnîşan kirin ku aştî jî divê li Meclîsê were avakirin. Dayikan gotin, “Eger şer li Meclîsê be, aştî jî wê li wir be.” Dayikan diyar kirin ku heya çareserî pêk tê, ew ê çûyîna Enqereyê bidomînin.
Li navçeya Cizîr a Şirnexê endamên Meclîsa Dayikên Aştiyê beriya meşa li Enqereyê bi rengekî girseyî hatin oxirkirin. Di dema oxirkirinê de dovîzên ji bo piştevaniya bi Rojava re hatin hildan û dirûşme hatin berzkirin.
Dayikên Aştiyê yên ku ji Wan, Gever û Erdîşê jî bi rê ketin, beriya rêwitiya Enqereyê meşek lidar xistin.
Dayikên Aştiyê yên ku ji bajarên cuda bi rê ketin, wê li Amed û cihên din werin ba hev û bigihijin Enqereyê.
