Komên HTŞ’î yên girêdayî hikûmeta demkî ya Şamê û çeteyên El-Emşat, El-Hemzat, Siltan Murad û Nureddîn Zengî yên ku dewleta Tirk piştgiriya wan dike, di 6’ê Çileyê de li dijî taxên Şêxmeqsûd, Eşrefiye û Benî Zeîd ên Helebê êrîşeke berfireh dan destpêkirin. Di van êrîşan de zêdetirî 80 tankan û 45 hezar çete hatin bikaranîn. Li dijî van êrîşan Hêzên Ewlekariya Hundirîn berxwedaneke dîrokî nîşan dan û Kurdên li çar parçeyên Kurdistanê jî bertekên tund nîşan dan.
Hevserokê Partiya Herêmên Demokratîk (DBP) yê bajarê Amedê Ahmet Dogan, derbarê êrîşên li ser Rojava de ji ajansa me re wiha axivî:
“Li hemberî van êrîşên ku li dijî gelê me yê li Rojava hatine kirin, em di nav hêrseke mezin de ne. Heftiyekê li herêmê wehşetek qewimî. Di taxên Şêxmeqsûd û Eşrefiyeyê de nêzî 400 hezar mirov dijiyan. Wekî tê zanîn di 1’ê Nîsanê de peymanek hatibû îmzekirin, di çarçoveya wê peymanê de hêzên QSD’ê ji herêmê vekişiyabûn û tenê Hêzên Ewlekariya Hundirîn mabûn.
Koma çeteyan a ji 45 hezar kesî pêk dihat, bi tank û topan heftiyekê êrîşî van taxan kir. Di van êrîşan de sîvîl, zarok, jin û kal bêyî ku cudahî were kirin bûn armanc. Komkujiyeke ku li tu pîvanên mirovî û sincî nayê pêk hat. Me hemûyan dît; çeteyan jineke ciwan ji qata sêyemîn avêtin xwarê. Ev barbarî ye.
Em pratîka DAÎŞ’ê ya 15 salên dawî pir baş dizanin. Tiştên îro diqewimin jî berdewamiya wê hişmendiyê ye. Li Tirkiyeyê behsa pêvajoyeke aştiyê tê kirin, lê di daxuyaniya Serokkomar de ku got ew di nav van planan de ne, baldar e. Hûn ê li aliyekî bi Kurdan re pêvajoya aştiyê bimeşînin, li aliyê din jî bi çeteyên wekî DAÎŞ’ê re êrîşî destkeftiyên gelê Kurd bikin. Em vê durûtiyê qebûl nakin.”
‘DIVÊ TIRKIYE DEV JI TEVGERÎNA BI ÇETEYAN RE BERDE’
Dogan êrîşên dewleta Tirk ên li ser destkeftiyên Kurdan ên li Rojava rexne kir û wiha berdewam kir: “Fêmkirina dijminatiya dewleta Tirk a li ser gelê Kurd a bi hevkariya çeteyan pir zehmet e. Tirkiye projeya sedsalî ya li Rojhilata Navîn baş dizane û her carê dibêje ku dê dor were wan jî. Madem dizanin dor dê were wan, nexwe divê bizanibin ku riya wan a tenê ya xelasiyê Rêberê Gelê Kurd Birêz Abdullah Ocalan e.
Çima hûn di vê dijminatiyê de israr dikin? Karê we bi çeteyên ku rûmeta mirovahiyê tune dihesibînin re çi ye? Gelê Kurd, her çend ji Şêxmeqsûd û Eşrefiyeyê vekişiyabe jî berxwedaneke dîrokî nîşan da. Heta ku hûn bi çeteyan re tevbigerin, ev zilm dê vegere ser we jî. Em pir baş dizanin ku Kurd çi dibe bila bibe dê bibin xwedî statû.
Gelê Kurd tu carî pişta xwe nespartiye tu kesî; her tim pişta xwe spartibû têkoşîn, gel, wêrekî û siyaseta xwe. Gava dewleta Tirk bi gelê Kurd û rêberê wî re li hev hat, wê demê dê hem xwe hem jî gelê xwe rizgar bike. Bila baş bizanibin ku li dûv re dor a Îranê ye; gava Îran bikeve dê dor were Tirkiyeyê jî.”
‘XELASÎ TENÊ BI AZADİYA FÎZÎKÎ YA RÊBER APO RE PÊKAN E’
Ahmet Dogan destnîşan kir ku çareseriya şerên li Rojhilata Navîn di azadiya fîzîkî ya Rêber Apo de ye û wiha lê zêde kir: “Rêberê Gelê Kurd Birêz Abdullah Ocalan aştî tercîh kir û aştî pêşkêşî Tirkiyeyê kir. Nêzî 20 roj in bi Birêz Abdullah Ocalan re hevdîtin nayê kirin. Sedema vê yekê êrîşên li ser Rojava ne. Naxwazin Birêz Ocalan fikrên xwe bêje. Ev xeletiyeke mezin e. Divê di zûtirîn dem de bi Birêz Ocalan re hevdîtin were kirin. Heta ku Tirkiye bi vê polîtîkayê bimeşe dê winda bike.
Em bang li dewleta Tirk dikin ku xwedî li pêvajoyê derkeve. Divê di zûtirîn dem de azadiya Rêberê Gelê Kurd Birêz Abdullah Ocalan were dabînkirin. Xelasiya tenê ev e. Daxwaza gelê Kurd ev e. Em azadiya Rêber Apo dixwazin. Rojhilata Navîn ketibe nav xeleka agir. Rêberê Gelê Kurd dixwaze Tirkiyeyê ji vê xeleka agir derxîne. Bila vê yekê pir baş bizanibin.”
