Bi hezaran kes ji şêniyên bajarê Dêrikê û koçberên Efrîn û Şehbayê, tevî Hêzên Ewlekariya Hundirîn, endam û rêveberên partiyên siyasî û civaka sivîl ji bo bîranîna fermandarê berxwedana Şêxmeqsûd, Eşrefiyê û Benî Zêd şehîd Ziyad Heleb û hevalên wî meşek li dar xist.
Girse ji Qada Azadî ya bajarê Dêrikê heya ber navenda Tevgera Ciwanên Şoreşger a Şehîd Bawer meşiyan. Di meşê de wêneyên şehîd Ziyad Heleb, şehîdên berxwedana Şêxmeqsûd, Eşrefiyê û Benî Zêde hatin hildan. Dirûşmên “Şehîd Ziyad namire” û “Şehîdên Şêxmeqsûdê namirin” jî hatin berzkirin.
Meş li pêşiya Navenda Şehîd Bawer sekinî û deqeyek rêz hat girtin. Piştre endamê Meclisa PYD’yê ya Dêrikê Mihemed Ebdulrehîm axivî.
Mihemed Ebdurehîm di axaftina xwe de şehîd Ziyad Heleb û tevahî şehîdên berxwedana Şêxmeqsûd, Eşrefiyê û Benî Zêde bi bîr anîn. Her wiha berxwedana şêniyên van taxan silav kir û girîngiya domandina têkoşînê vegot.
Çalakî bi berzkirina dirûşmên dilsoziya bi şehîdan re û silavkirina berxwedana Şêxmeqsûd, Eşrefiyê û Benî Zêde bi dawî bû.
