Ji gaziyên Bakur û Rojhilatê Sûriyeyê Şîlan Kobanê û Viyan Gabar Efrîn têkildarî êrîşên çeteyan ên li hember taxên Şêxmeqsûd û Eşrefiyê yên Helebê û berxwedana li hember wan êrîşan nêrînên xwe anîn ziman.
Şîlan Kobanê diyar kir ku armanca êrîşan jiholêrakirina rêveberiya xweser û doza azadiyê ya di pêşengiya jinan de ye û got, “Çeteyên ku piraniya wan DAÎŞ’î û girêdayî dewleta Tirk in, êrîşeke herî hovane li hember gelê me yê Şêxmeqsûd û Eşrefiyê pêk anîn. Li wan taxan tenê hêzên asayîşê û gelê sivîl hebû. Li hember wan êrişên bêrehm û hovane hate kirin.”
Şîlan Kobanê anî ziman ku çete welê difikirîn ku wê gel û hêzên asayîşê di demeke kurt de teslîmî wan bibin û wiha domand, “Lê belê tişta wan çeteyan û yên piştgiriya wan dikirin hîn jî fêm nekirine ew e ku ti carî jin û xortên bi fikir û bîrdoziya Rêbertî xwe perwerde kirine teslîmî kesî nabin. Ev êrîşên çeteyan bi berxwedaneke bêhempa ya di pêşengiya fermandarê nemir Ziyad Heleb û Denîzan de hatin têkbirin.”
Gazî Şîlan Kobanê ragihand ku berxwedana li taxên Şêxmeqsûd û Eşrefiyê berxwedaneke dîrokî ye û got, “Hevalên me yên jin Leyla Qasim, Gerîla Amara, Denîz Efrîn li hember êrîşên nemerdane heya dawiyê têkoşiyan. Wan hevalan israra gelê Kurd a azadiyê bi serketinê tacîdar kirin. Fermandarê hêja Ziyad Heleb û hevrêyên wî berxwedana wê bi sedê salan were behskirin pêş xistin. Em heya dawiyê deyndarên wan hevalên xwe yên hêja û pîroz in.”
Şîlan Kobanê di dawiya axaftina xwe de jî anî ziman ku wê ti carî dest ji doza xwe ya azadiyê bernedin û got, “Weke hevalên gazî li her cihî li hember êrîşan em ê gelên xwe biparêzin. Wesiyeta wan hemû şehîdan ji bo me ew e. Dema ber bi nemiriyê ve çûn, dizanîn wê hevrêyên wan al û çekên wan li erdê nehêlin. Em soz didin armanc û hedefên şehîdên xwe bi serketinê tacîdar bikin.”
‘EM Ê HETA DAWIYÊ ALA SERKETINÊ BILIND BIKIN’
Viyan Gabar Efrîn jî bal kişand ser zîhniyeta tarî ya çeteyên êrîşkar û got, “Ew qatil û çeteyên xwedî zîhniyeta qatilê kastîk in, xwestin li taxên Şêxmeqsûd û Eşrefiyê doz û têkoşîna azadiyê ya gelên me ji holê rakin. Ev zîhniyeta bi hezarê salan e bi rê û rêbazên cuda didome, dijminê jinên afirîner û azadîxwaz in. Ew çeteyên herî zêde ji jinên berxwedêr û têkoşer ditirsin li hember cenazeyên hevalên jin bêrêzî û hovîtî kirin. Me ew kiryarên hovane di êrîşên çeteyên DAÎŞ’ê yên li Şengalê û gelek deverên din de jî dîtin.”
Viyan Gabar Efrîn diyar kir ku taxên Şêxmeqsûd û Eşrefiyê di şexsê fermandar Ziyad, Denîz û Leylayan de şahidî ji berxwedaneke teslîmiyetê red dike re kir û wiha axivî, “Wan çeteyên xwedî zîhniyeta qatilên kastîk li dijî kelehên berxwedanê Şêxmeqsûd û Eşrefiyê êrîşên hovane pêk anîn. Şopdarên çanda dayika xwedawend li dijî wan êrîşan berxwedaneke bilind pêş xistin. Serî ji Dehaqan re nedanîn.”
Viyan Gabar Efrîn axaftina xwe wiha bi dawî kir, “Em ê tola wan şehîdên giranbiha teqez rakin. Weke şopdarên Ziyad û Denîzan soz didin şehîdên xwe û gelê xwe ala serketinê heya dawiyê em ê bilind bikin. Bi ruh û îradeya Denîz, Feraşîn û Gerîla Amara de em ê welatekî azad ava bikin. Em ê tola hemû cangoriyên xwe rakin.”
