Êrîşên çeteyên HTŞ’ê yên di bin kontrola dewleta Tirk de ne li ser bajarê Helebê yê Sûriyeyê û Bakur û Rojhilatê Sûriyeyê li gelek bajarê Tirkiyeyê hatin protestokirin. Di çalakiyên li Edene, Îzmîr û Stenbolê de bertek nîşanî komkujiyên li Rojava û taxên Şêxmeqsûd-Eşrefiyê dan.
EDENE
Li ser banga Platforma Saziyên Demokratîk a Edeneyê bi sedan kes li Kolana Mîthatpaşa ya Seyhanê kom bûn û bi pankarta “Rojava xeta me ya sor e” meşek li dar xistinî Di meşê de dirûşmeyên “Bijî berxwedana Rojava”, “Rojava wê ji DAÎŞ’ê re bibe goristan” û “Kurdistan wê ji faşîzmê re bibe goristan” berz kirin.
Piştî meşê, Parlamenterê DEM Partiyê yê Mersînê Alî Bozan axivî. Bozan bi bîr xist ku sê ciwanên Meclîsa Ciwanên Edeneyê ji ber beşdarî meşa li taxa Dikiliyê bûne ji hêla dadgehê ve hatin girtin û got, “We sê ciwan girtin, lê ciwanên Edeneyê li vir in. Ciwanên Kurd ji bo parastina Rojava dimeşin.” Bozan diyar kir ku li Rojava sivîl dibin hedef û wiha berdewam kir: “Ev polîtîka li Bakur pêk nehat û wê li Rojava jî pêk neyê. Heta ku êrîş û komkujiyên li dijî Kurdên li Rojava û Sûriyeyê rawestin em ê li kolanan bin.”
ÎZMÎR
Platforma Saziyên Demokratîk a Îzmîrê li Çîmentepeyê daxuyanî da û nobeta wijdanê li dar xist. Di çalakiyê de pankarta “Em li hember komkujiya li Rojava bêdeng namînin” hat vekirin û dirûşmeya “Bijî berxwedana Rojava” hat berzkirin. Hevserokê DEM Partiyê yê Konakê Bahattîn Ozel di çalakiyê de axivî û got, “Ev êrîş êrîşeke li dijî felsefeya Jin, Jiyan, Azadî, ku li Rojava derketiye holê û rizgariya jinan wekî hêmanek bingehîn a azadiya civakî dibîne ye. Gelê Rojava li hember van êrîşan paşve gav neavêtiye û wê neavêje.”
Piştî daxuyaniyê, girse ji bo “nobeta wijdanê” ber bi Ofîsa Nûnertiya DEM Partiyê ya Çîmentepeyê ve meşiya û bertek nîşanî êrîşan dan.
STENBOL
Li navçeyên Arnavutkoy, Kartal û Başakşehîrê yên Stenbolê bi dirûşmeyên “Rojava wijdan, azadî, berxwedan e; nayê tepeserkirin” bertek nîşanî êrîşan dan.
Di daxuyaniyan de hat diyarkirin ku di êrîşên çeteyên HTŞ’ê de çekên giran hatin bikaranîn, sivîl rasterast hedef hatin digirin û ev yek sûcê li dijî mirovahiyê ye.
Çalakî bi berzkirina dirûşmeyan bi dawî bû.
