Di çalakiya ku li Parka Kırkayakê hate kirin de sloganên “Bijî berxwedana Rojava”, “Bijî berxwedana Kobanê”, “Yek e, yek e, gelê Kurd yek e” û “Bijî Serok Apo” hatin avêtin.
Berdevkê Serdema Şaxên KESK’ê yê Dîlokê Yilmaz Sucu yê li ser navê platformê axivî, diyar kir ku li Rojava bi sed hezaran mirov ji av, elektrîk, xurek û xizmetên tenduristiyê bêpar hatine hiştin û got ku sivîl bi xeteriya birçîbûn û cemidînê re rû bi rû ne. Sucu diyar kir ku tiştên diqewimin binpêkirina giran a hiqûqa mirovî ya navneteweyî ye.
Cîgira Seroka Koma DEM Partiyê Gulîstan Kiliç Koçyîgît a ku di daxuyaniyê de axivî, diyar kir ku Rojava qadeke wisa ye ku modela jiyana azadîxwaziya jinê, piralî û demokratîk lê şîn bûye û got, “Rojava îro cihê ku hemû nirxên em diparêzin lê bûne goşt û hestî.”
Gulîstan Kiliç Koçyîgît got, “Ji ber wê, çi dibe bila bibe em ê Rojava biparêzin” û destnîşan kir ku gelê Kurd ruhê yekîtiya neteweyî li kolanan nîşan daye û anî ziman ku ew bawer dikin gava gel li cem hev bisekinin dê qezenc bikin.
Gulîstan Kiliç Koçyîgît her wiha diyar kir ku divê Pêvajoya Aştî û Civaka Demokratîk a ku bi banga 27’ê Sibatê ya Rêber Apo dest pê kiriye bi lez were pêşdebirin, hişyarî da ku dirêjbûna pêvajoyê rîskên cidî dihewîne û bang li hikûmetê kir ku gavên berbiçav biavêje.
Gulîstan Kiliç Koçyîgît got, “Banga me ji bo Tirkiyeyê ev e: Siyaseta aştiya di hundur de û aştiya li herêmê li ser zemînekî rastîn bixin pratîkê. Hûn dibêjin biratî, erka biratiyê bînin cih, û gav biavêjin.”
