Peyama sersaxiyê ya Hevserokatiya Konseya Rêveber a KCK’ê bi vî rengî ye:
“Bi xemgînî em pê hesiyan ku lêkolîner û nivîskarê hêja rewşenbîrê welatparêz ê Kurd M. Emîn Bozarslan jiyana xwe ji dest da. Bila serê malbat û xizmên wî, hemû dost û hezkiriyên wî, rewşenbîrênw Kurd û gelê Kurd ê welatparêz sax be.
M. Emîn Bozarslan bi têkoşîn û karên xwe yên hêja xizmeteke mezin ji gelê Kurd re kir, kesayetekî welatparêz, gelparêz û rewşenbîr bû. Li ser wêje, dîrok û zimanê gelê Kurd xebitî ku tinebûn li ser tê ferzkirin û tine tê hesibandin. Bi afirandina berheman ji aliyê hînbûna wêje, dîrok û ziman ve û afirandina hişmendiya civakî û neteweyî tevkarieyke mezin ji bo gelê Kurd kir. Di gelek qadan de gavên destpêkê avêt û kar kir. Bi taybetî ciwanên Kurd bi berhemên rewşenbîrên hêja yên weke wî mezin bûn, firsend dîtin ku ziman, çand û dîroka xwe hîn bibin. Bêguman ev hişmendî û danhevî ber bi têkoşîna azadiyê ve jî herikî û têkoşîn xurt kir. Ev yek ji bo gelê me ku ji bo hebûn û azadiyê têdikoşe, xwedî wateyeke mezin e. Ji ber vê yekê gelê me keda hunermend, nivîskar û rewşenbîrên hêja yên weke M. Emîn Bozarslan her tim silav kiriye.
M. Emîn Bozarslan ê hêja li gel karên xwe yên nivîskî her tim di nava têkoşînê de bû. Weke gelek rewşenbîr û nivîskaran wî jî şahidî ji zilma sîstema qirker û înkarê re kiribû, hatibû binçavkirin, girtin, êşkence dîtibû. Herî dawî neçar mabû ku biçe sirgûnê. Lê belê dest ji sekna xwe ya azadiyê berneda û bû mirov û rewşenbîrekî têkoşînê yê rasteqîn û di jiyana xwe de ev yek temsîl kir.
Ji ber tevkariyên wî yên hêja bi navê Tevgera Azadiyê ya Kurd em spasiya wî dikin û li pêşberî têkoşîna wî bejna xwe bi rêzdarî ditewînin. Gelê Kurd wê karên hêja û têkoşîna M. Emîn Bozarslan ê hêja ti carî ji bîr neke. Em careke din sersaxiyê ji gelê me yê welatparêz, rewşenbîrên Kurd, dost, malbat û xizmên wî re dixwazin.”
