Deklarasyon li Salona Konferansê ya Alî Emîrî ya Şaredariya Bajarê Mezin a Amedê bi civînekê hate eşkerekirin.
Nûnerên rêxistinên civakî yên sivîl û partiyên siyasî beşdarî daxuyaniyê bûn. Metna daxuyaniyê bi Kirmanckî ji aliyê Stran Yaşar a ji Komeleya Wêjevanên Kurd û Kurmanciya wê jî ji aliyê Rifat Ronî ji Komeleya Lêkolînê ya Çand û Ziman a Mezopotamyayê (MED-DER) ve hate eşkerekirin.
ZIMAN RÛMET E Û NASNAME YE
Di deklarasyonê de hate ragihandin ku ziman ji bo gelan rûmet, nasname û hebûn e û hate destnîşankirin ku wekheviya zimanê dayikê û pirzimanî bingeha jiyana bi hev re ye.
Her wiha hate bibîrxistin ku 21’ê Sibatê xwe dispêre têkoşîna zimanê dayikê ya gelê Bengalê (Bangladeş a îro) û ji aliyê UNESCO ve weke Roja Zimanê Dayikê ya Cîhanê hatiye ragihandin.
Hate gotin, gelê Kurd zêdeyî sed sal in li hemberî polîtîkayên înkarê ya li ser nasname, ziman têdikoşe û hate xwestin, Kurdî bibe xwedî statu û bi destûra bingehîn bê garantîkirin.
BERNAMEYA ÇALAKIYAN
Saziyên Zimanê Kurdî diyar kirin ku di çarçoveya 21’ê Sibatê de wê bi dirûşma ‘Statu ji Kurdî re, perwerde bi Kurdî’ panel, meş, şano, nîşandana fîlm û dokûmanteran, şevên dengbêjiyê, rojên îmzekirina pirtûkan û konserên pirzimanî bêne lidarxistin.
Her wiha bi daxwaza perwerdeya bi Kurdî wê stand bêne danîn, semîner ji bo malbatan werin lidarxistin û ji bo parastina zaravayê Kirmanckî name ji UNESCo û Wezareta Perwerdeyê ya Mîllî re bêne şandin.
TÊKOŞÎN WÊ DEWAM BIKE
Di deklarasyonê de hate destnîşankirin ku heta Kurdî bibe xwedî statu, ji perwerdeya beriya dibistanê heta zanîngehê bibe zimanê perwedeyê wê têkoşîn dewam bike.
