Înîsiyatîfa Azadî ji Abdullah Ocalan re ya Ereb bi wesîleya salvegera 27’an a komploya 15’ê Sibata 1999’an daxuyaniyek da.
Di destpêka daxuyaniyê de hate gotin “27 sal di ser yek ji bûyerên herî xeternak ên dîroka nûjen a Rojhilata Navîn re derbas bûn: Rêber Abdullah Ocalan piştî zext û dersînokirina bi darê zorê ku têlên wê di payîza 1998’an de, bi komployeke navneteweyî ya bi serkêşya NATO’yê (DYE û Îsraîlê) di 15’ê Sibata 1999’an de hat revandin. Ev komplo ne li dijî Rêber Abdullah Ocalan tenê bû, lê belê gelê Kurd û projeyek fikrî û siyasî hedef kir.”
Di daxuyaniyê de hate destnîşankirin ku salan isbat kirin ku komplo ne bûyerek ji rêzê ya di çarçoveya şerekî navxweyî de bû, lê beşek ji nû ve dazeynekirineke berfirehtir a Rojhilata Navîn bû, armanc ew bû ku her hewldanek ji bo avakirina rêyek demokratîk ên li ser bingeha xwişk û biratiya gelan û jiyana hevbeş a di navbera pêkhateyên neteweyî û olî de têk biçe.
Di daxuyaniyê de işaret bi vê yekê hat kirin ku komploya navneteweyî bi rêbzên cuda dewam dike û ev nirxandin hatin kir “Piştî 27 salan careke din nîşaneyên heman komployê lê bi rêbzên cuda derketin holê. Rejîma Tirk û hêzên din ên ku komploger, serkêşiya komploya 6’ê Çileya îsal kirin. Di vê çarçoveyê de êrişên tesfiyekirinê li dijî projeya Rêveberiya Xweser a Bakur û Rojhilatê Sûriyeyê dan destpêkirin. Ev proje jî berhema ramanên Rêber Abdullah Ocalan ên der barê neteweya demokratîk, nenavendîtî, avakirina hevpeymanek civakî ya hevpar di navbera Kurd, Ereb, Suryan û pêkhateyên din de ye.”
Di daxuyaniyê de hate gotin, hedefkirina projeya Rêveberiya Xweser û jiyana hevbeş a li Sûriyeyê di heman demê de hedefkirina pêvajoya Aştî û Civaka Demokratîk e ku Rêber Apo di 27’ê Sibata 2025’an de ragihandibû. Hate bibîrxistin ku gelê Kurd di çarçoveya pêvajoyê de gavên girîng avêtin, lê dewleta Tirk tu gavên cidî, di serî de azadkirina fîzîkî ya Rêber Apo neavêt.
Di daxuyaniyê de komploya navneteweyî ya li dijî Rêber Apo hat şermezarkirin û hate gotin, rejîma Tirk û hêzên navneteweyî yên beşdarî komployê bûne, berpirsên sereke yên rêvebirin û pêkanîna komployê ne.
Di daxuyaniyê de işaret bi tecrîda li ser Rêber Apojî hat kirin û hate diyarkirin ku tecrîd binpêkirina qanûna navneteweyî û nirxên edaleta mirovî ye. Her wiha hate destnîşankirin berdewama tecrîdê dihêle ku Rêber Abdullah Ocalan nikaribe rola xwe ya esasî di pêvajoya aştî û civaka demokratîk de bilîze.
Di daxuyaniyê de bal hat kişandin ku hedefgirtina projeya Rêveberiya Xweser û hewldana jihevxistina wê berdewama kompoya yekemîn e û derfetên çareseriya demokratîk a pirsgirêka Kurdî di hundirê dewletê de asteng dike.
Di daxuyaniyê de hate gotin, hedefgirtina hevbendiya Kurdî-Erebî xizmeta projeyên jihevxistin û kaosan dike, lê ximzeta gelên ku li hemberî teror û tundrawiyê berdêlên giran dane, nake.
Di dewama daxuyaniyê de hate diyarkirin ku “Ezmûn îspat kiriye dîlgiritna fîzîkî nayê wateya bêdengkirina ramanê. Ramanên ku ji girtîgeha Îmraliyê derketin holê dîwaran derbas kirin û hişt ku nîqaşek kûr li ser wateya dewlet, hemwelatîbûn û nasnameyê li Rojhilata Navîn ji nû ve were şikildayîn. Bi her hewldanek bêdengkirina vî dengî, nîqaşa li ser alternatîfên demokratîk ên gengaz li herêmek ku ji şer û pevçûnan westiyayî ye berfireh dibe. Her rêyek cidî ya ji bo aramî û ewlehiyê li herêmê bi çareseriyek siyasî ya dadperwer ji bo pirsgirêka Kurd, bidawîkirina tecrîda li ser Ocalan ve girêdayî ye.”
Di dawiya daxuyaniyê de hate gotin “Di salvegera 27’an de, em bûyerek dîrokî ya trajedîk bi bîr tînîn, lê wekî dersa; bi dîlgirtinê fikr û felsefeya wî tesfiye nabe. Li ser xirbeyên hevkariyên di navbera gelan de îstîqrara mayînde ava nabe.”
