Komîsyon ji bo dengdanê li ser rewşa dawî ya raporê bike cara dawî li hev civiya. Rapor ji 7 sernavên esasîp êk tê. Nirxandin, rexnekirin û pêşniyarên li ser raporê dewam dikin. Di dawiya civîna komîsyonê de tê payin ku dengdan li ser raporê bê kirin û bi piraniya dengan bê qebûlkirin.
ÇARÇOVEYEKE NÛ YA HIQÛQÎ
Di raporê de hate ragihandin ku qonaxa herî krîtîk a pêvajoyê çekdanîna PKK’ê ye. Hate ragihandin ku çekdanîn divê ji aliyê yekîneyên ewlekariyê yên dewletê ve bê tespîtkirin û piştrastkirin û hate gotin, ev yek wê ne tenê bêdengbûna çekan be, di heman demê de bibe destpêka demeke nû ya siyasî û hiqûqî.
Di vê çarçoveyê de hate pêşniyarkirin ku ji bo pêvajoya fesixkirinê û çekdanînê qanûneke taybet û derbasbûnê bê amadekirin. Hate destnîşankirin ku qanûna navborî divê xwedî çarçoveyeke welê be ku siyaseta demokratîk xurt bike û berfireh-tevgir be ku pêvajoyê û dema piştî pêvajoyê bi rê ve bibe.
VEGER Û SIYASETA DEMOKRATÎK
Di raporê de ji bo kesên çekê û tundiyê red dikin bi rengekî ewle û wekhev vegerin, pêşniyar hate kirin ku sererastkirinek bê kirin. Ji bo armanca vê yekê jî hate gotin; armanc ew e ku mesele ber bi zemîna hiqûqî û siyasî ve bê kişandin û qada siyaseta demokratîk bê xurtkirin.
GARANTIYA HIQÛQÎ JI BO BEŞDARÊN PÊVAJOYÊ
Hate pêşniyarkirin ku ji bo kesên tevlî karên komîsyonê bûn, nêrîna xwe parve kirin û di vê pêvajoyê de wezîfe kirin, garantiya hiqûqî bê dayin. Hate destnîşankirin ku karên van kesan divê bi rengekî qanûnî bêne parastin.
‘MAFÊ HÊVIYÊ’ Û SERERASTKIRINA ÎNFAZÊ
Di raporê de “Mafê Hêviyê” li ser bingeha mafên mirovan hate nirxandin. Pêşniyar hate ikrin ku mewzûata înfazê li gorî biryarên Dadgeha Mafên Mirovan a Ewropayê û Dadgeha Destûra Bingehîn ve jinûve di ber çavan re bêne derbaskirin.
Hate gotin, mekanîzmaya taloqkirina înfazê ya ji bo girtiyên nexweş û extiyar jinûve bê nirxandin, darizandina negirtî esas bê wergirtin û edaleta înfazê bê xurtkirin.
MEKANÎZMAYA ŞOPANDIN Û RAPORKIRINÊ
Ji bo pêvajo bi rengekî çê û erênî bê meşandin pêşniyar hate kirin ku nava organa rêveberiyê de mekanîzmaya şopandinê û raporkirinê bê avakirin. Hate ragihandin ku ev mekanîzma divê rêvebirinê bişopîne û asta gihîştina armancê binirxîne.
SERERASTKIRINA QEYÛM
Di raporê de pêşniyar hate kirin ku eger şaredar ji wezîfeyê bê dûrxistin li şûna tayînkirina qeyûm divê li nava Meclîsa Şaredariyê hilbijartin bê kirin û şaredar bê hilbijartin.
