Malbatên bi sedan kesên li taxên Şêxmeqsûd û Eşrefiyê yên Helebê, Dêr Hafir, Reqa-Tebqayê di şer de şehîd bûn û dîl hatin girtin, bi hefteyan e hewl didin dengê xwe bidin bihîstin.
Malbat bi dirûşma “Zarokên me bidin me, cenazeyên şehîdên me bidin me” dengê xwe bilind dikin, lê belê heta niha gaveke şênber nehatiye avêtin.
Malbatên şervan û sivîlên ku di şer de dîl ketin destê çeteyan, 25’ê Sibatê roja Çarşemê li ber navenda Neteweyên Yekbûyî ya li Qamişloyê çalakî kirin.
Bavek ku di çalakiyê de dowîza bi nivîsa “Ez dixwazim zarokên me bêne berdan” hilda bû, daxwaza berdana kurê xwe Zinar Zagros kir.
Bav got, “Ez dixwazim kurê min Zinar Zagros û ewladên me hemû ji wan zindanên tarî derkevin. Em jiyaneke bi rûmet û azad dixwazin. Me çi kir? Me çi sûc kir? Me ji bo mirovahî û xwişk-biratiyê têkoşîn dikir. Ez dixwazim ewladê min bê berdan” û nîşaneya serketinê kir.
Dayikekê jî anî ziman ku sê meh in wê kurekî xwe winda kiriye, her wiha ji destpêka şer û vir ve agahiyê ji kurê xwe yê din nagire.
Dayikê got, “Ji destpêka şer û vir ve agahiyek jê nîne. Şehîd e, winda ye, em pê nizanin. Divê ev gel bi tenê neyê hiştin. Em di rojên gelekî giran de ne. Dawiya sebrê heye. Di vê meha pîroz de em dixwazin ewladên me li dayikên xwe vegerin.”
Dayika Murad Eşqer, Behiye Ferhan Elî jî diyar kir ku hem kurê wê dîl ketiye hem jî ji malbata wê du kes winda bûne. Dayikê rahişt wêneyê kurê xwe û ev bang kir: “Ev kurê min ê dîlgirtî ye. Li Dêr Hafirê dîl hate girtin. Em bi aqûbeta wî nizanin. Ewladekî min şehîd, yek êsîr, zavayê min jî şehîd bûye. Weke dayikekê ez çi bikim? Em dixwazin dengê me bigihêje hemû welatan. Zarokên me serbest berdin.”
Di serî de Neteweyên Yekbûyî malbat dixwazin hemûs aziyên mafên mirovan ên navneteweyî bikevin dewrê. Her wiha dixwazin ku rewşa êsîran ji aliyê heyetên serbixwe ve bê lêkolîn, aqûbeta windayan bê eşkerekirin û cenazeyên şehîdan radestî malbatên wan bêne kirin.
