Fîlozof-Civaknas John Holloway têkildarî daxuyaniya Rêber Apo a bi boneya salvegera Banga Aşitî û Civaka Demokratîk ya 27’ê Sibatê dayî, axivî. Holloway ji Rojnameger Erem Kansoy re axivî û got ku azadiya Rêber Apo hem ji bo çareserkirina bêedaletiyê hem jî ji bo destpêkirina lihevkirineke demokratîk gelekî girîng e.
Fîlozof Holloway bi awayekî eşkere diyar kir ku divê Rêber Apo serbest were berdan û destnîşan kir ku ev yek di heman demê de ji bo derbaskirina atmosfera şer û pevçûnan û zextê jî gelekî girîng e û got: ‘’Êdî bi têra xwe şer û pevçûn çêbûne, bi têra xwe zext hatiye kirin.’’ Holloway piştre anî ziman ku tişta hewce lihevkirinek e ku çandên cuda, kevneşopiyên cuda û komên civakî nas dike û qebûl dike.
‘EV PÊVAJO NEÇAR E XWE BISPÊRE DEMOKRASIYA KOLEKTÎF’
Fîlozof Holloway diyar kir ku azadiya Rêber Apo di pêvajoyeke lihevkirinê ya bi vî rengî de wê bibe pêngaveke girîng û got ku fikrên Rêber Apo li seranserê cîhanê her ku diçe zêdetir eleqeyê dibîne.
Holloway piştre destnîşan kir ku li Meksîkayê berhemên Rêber Apo tên xwendin û gelekî tên nîqaşkirin û ev yek anîn ziman: ‘’Bo mînak li vir, li Meksîkayê em nû dest bi xwendina berhemên wî dikin; gelekî zêde tên xwendin û nîqaşkirin. Û bi min fikrên wî, ji bo avakirina pêvajoyeke hevdûnaskirinê bi rastî jî bingehekê teşkîl dike.’’
Fîlozof Holloway bal kişand ser girîngiya navenda perspektîfa civaka demokratîk û got: ‘’Ev pêvajo neçar e ku di dawiyê de xwe bispêre demokrasiyeke komunal yan jî kolektîf.’’
‘TÊKILDARÎ PÊKVEJIYANÊ AWAYEKÎ FIKIRÎNA CUDA’
Fîlozof Holloway di dewama axaftina xwe de diyar kir ku Rêber Apo têkildarî fikra pêkvejiyanê helwesteke alternatîf pêşkêş dike û îfade kir ku ev yek ji nêzîkatiya siyaseta navenddewletî wêdetir e. Holloway piştre destnîşan kir ku naskirina girîngiya têkoşîna gelê Kurd û qebûlkirina hemwelatîbûna gelê Kurd û daxwazên wan ên têkildarî xweseriyê ya ji aliyê dewleta Tirk ve tê wateya veguherîneke demokratîk a mezin û got: ‘’Ocalan, têkildarî pêkvejiyanê û pêkanîna vê yekê rê li ber awayekî fikirîna cuda vedike.’’
‘DEMOKRASIYEKE KÛR PÊKAN E’
Fîlozof Holloway anî ziman ku daxuyaniya Rêber Apo a dawîn xwe dispêre nêzîkatiyeke demokrasiya berfireh û got: ‘’Bi rastî jî nîşan dide ku em dikarin pergaleke demokrasiyê ya kûr a ku însan nayên vederkirin, beşdarî pêvajoyê dibin û tên guhadarkirin, ava bikin. Ev ne fikreke utopîk e. Dikare were kirin.’’
‘DIVÊ JI PEYAMA AŞITIYÊ RE BERSIVEKE ERÊNÎ WERE DAYÎN’
John Hollowat di dawiya axaftina xwe de anî ziman ku fikrên Rêber Apo bes bi Tirkiyeyê re sînordar nînin, îfade kir ku geşedanên li Rojhilata Navîn û bi taybetî jî pratîkên di 14 salên dawîn de li Rojava derketine holê ji aliyê cîhanê ve gelekî girîng in û got: ‘’Helbet fikrên Ocalan bi awayekî rasterast girêdayî pêvajoya li Tirkiyeyê û Rojhilata Navîn e. Lê belê fikrên wî û pratîka ku di 14 salên dawîn de li Rojava derketine holê ji bo hemû cîhanê gelekî girîng in. Ez bi dil û can hêvî dikim ku dewleta Tirk bi awayekî erênî bersivê bide peyama Ocalan a vê sibehê careke din dubare kir.’’
