Komcivîna ku gelek jin lê amade bûn bi deqeyek rêzgirtin destpê kir. Endama platformê Saliha Ayata anî ziman ku ew ê li ser avakirina tora têkoşîna ya li dijî polîtîkayên li hember jinê nîqaşan bimeşînin.
Hevberdevka Înîsiyatîfa Yekîtiya Demokratîk Gulcan Kaçmaz Sayyîgît diyar kir ku jinên Kurd hê nekariye yekîtiyeke xurt ava bike û vê rastî wekî kêmasiyeke cidî nirxand.
Gulcan Kaçmaz da xuyakirin ku divê jinên Kurd ji Rojava heta Rojhilat li ser zemîneke hevpar a têkoşînê bên cem hev û got ku dema yekîtî pêk were hem li dijî polîtîkayên şer û hem jî li dijî êrîşên zîhniyeta serdest a mêr, sekneke xurt dikare were raberkirin.
Gulcan Kaçmaz anî ziman ku divê jinên Kurd di nav şerê li Rojhilata Navîn de roleke pêşeng bilîzin û got ku divê destketiyên Kurdan ji ber nêrînên îdeolojîk ên cuda neyên piştguhkirin.
Gulcan Kaçmaz Sayyîgît da zanîn ku banga ‘Aştî û Civaka Demokratîk’ a 27’ê Sibatê li her çar parçeyên Kurdistanê deng veda û got ku ew ê di vê çarçoveyê de xebatên xwe dewam bikin.
Di komcivînê de behsa 8’ê Adarê Roja Jinên Cîhanê hat kirin. Hat destnîşan kirin ku divê jin rola xwe ya pêşeng di hemû warên jiyanê de bi yekîtî bidomînin û girîngiya yekîtiya jinên Kurd hat nirxandin.
Hat diyarkirin ku têkoşîna li her parçeyê aliyê din xurt dike û hat gotin ku armanc yekîtiya neteweyî ye. Bang li her kesî hat kirin ku bi felsefeya “Jin jiyan azadî” di 8’ê Adarê de dakevin kolanan.
Her wiha Sakîne Cansiz û Hevrîn Xelef hatin bîranîn û hat gotin ku têkoşîn li ser rêya wan didome û divê yekîtiya jinên Kurd bê xurtkirin.
Piştre peyama Hevseroka Kongreya Neteweyî ya Kurdistanê (KNK) Zeynep Mûrat, hat nîşandan. Her wiha peyamên 30 jinên Başûr ku ji ber şerê li Rojhilat û pirsgirêkên derketin nehatin û Platforma Yekîtiya Jinên Kurd a Ewropayê hat xwendin.
Komcivîn ji çapemeniyê re girtî dewam dike.
