Li Mala Çandê ya bajarê Miçûrînskê ya navçeya Tambovê bi boneya 8’ê Adarê, Roja Jinên Kedkar ên Cîhanê, civînek hat lidar xistin. Di civînê de gelek jin û welatî amade bûn.
Civîn bi deqeyek rêzgirtinê dest pê kir û piştre li ser wateya rojê sinevîzyonek hate temaşekirin.
Di civînê de endama Tevgera Jinê Fatma Arîn axivî û bal kişand ser wateya dîrokî ya 8’ê Adarê. Fatma Arîn got, “8’ê Adarê xwedî mîrateyek xurt e. Jinên Kurd îro têkoşîna jinan a ku di sala 1857’an de dest pê kiriye bi biryardariyeke mezin didomînin.”
Fatma Arîn, diyar kir ku jinên Kurd bi saya îdeolojiya Rêber Apo ya azadiya jinê, bûne xwedî partî û artêşên xweser.
Fatma Arîn got, “Sîstemên desthilatdar hewl didin 8’ê Adarê weke cejna malbatê an jî rojek taybet ji bo jinan nîşan bidin. Lê di rastiyê de ev roj bi ked û têkoşîna jinan hatî bidest xistin. Di nava şoreşa gelê Kurd de wateya vê rojê hatiye zindî kirin û zêdetir pêşxistin. Jinên Kurd bûne pêşengên têkoşîna tevahiya jinên cîhanê.”
Di dawiyê de Berpirsyara Meclîsa Jin Zimfira Usiv û Hevserokê Meclîsa Gel Serdar Mikayîl jî axivîn û 8’ê Adarê li hemû jinan pîroz kirin.
Civîn bi berzkirina dirûşmeya “Jin, Jiyan, Azadî” û gerandina govendê bi dawî bû.
Li navçeya Yerşovê ya girêdayî bajarê Saratovê jî bi heman boneyê 8’ê Adarê hat pîrozkirin.
Çalakî bi deqeyek rêzgirtin ji bo cangoriyên azadiyê dest pê kir. Piştî wê Endama Tevgera Jinên Yerşovê Şûşan Bayroyêva, li ser wateya dîrokî ya vê rojê axivî.
Şûşan Bayroyeva, 8’ê Adarê li Rêber Apo û hemû jinên kedkar ên cîhanê pîroz kir û bal kişand ser kampanyaya KJK’ê ya bi navê “Niha Dema Jinan e” û got: “Ev dem, dema azadiya jinan e û her wiha dema azadiya Rêber Apo ye.”
Çalakî bi bernameyên hunerî û stranên hunermend Ahmed Bakiyev û Mahîr bi dawî bû.
