Li Wanê Tevgera Jinên Azad (TJA), DBP û DEM Partî bi dirûşmeya “Newroza Azadî û Demokrasiyê” bi daxuyaniya çapemenyê danezana Newrozê hat ragihandin. Daxuyaniya ku li Malên Wanê yên Dîrokî hat dayin de endam û nûnerên saziyên civak beşdar bên. Metna daxuyaniyê ya Kurdî Yakûp Almaç û Tirkî jî Herdem Acar xwendin.
Di daxuyaniyê de hat diyarkirin ku ew di demeke dîrokî de derbas dibin û got: “Krîza pergalî di Rojhilata Navîn de kûrtir dibe. Hêzên hegemonîk dixwazin statuya dewleta neteweyî ya ku li ser înkara gelê Kurd hatî avakirin bidomînin. Lê li dijî vê siyasetê, gelê Kurd li dora destkeftiyên Rojava û Kurdistanê bûye yek. Gelê Kurd kevneşopiya berxwedana xwe xurt kiriye û bi hevalbendên xwe re têkoşîna xwe roj bi roj pêş dixe.”
Di daxuyaniyê de bal kişand ser destketiyên gelê Kurd û bi lêv kir ku parastina destkeftiyan bi xurtkirina yekitiya neteweyî pêkan e û wiha pê de çû: “Helwesta siyasî ya hevpar, hişmendiya parastinê û perspektîfa pêşeroja hevbeş bingehên vê yekîtiyê ne. Her ku yekitiya neteweyî xurt dibe, destkeftiyên demokratîk jî li ser bingeheke xurt têne avakirin. Bi vê ruhê em bi dirûşmeya “Newroza azadî û yekîtiya demokratîk” pêşwaziya Newroza 2026an dikin.Ji bo gelê Kurd, Newroz sembola serhildana li dijî zilmê, îradeya hebûnê li dijî înkarê û agirê azadiyê ye. Gelê me yê ku ziman û nasnameya wî hatine qedexekirin, bi agirê Newrozê bîra xwe ya dîrokî parastiye, berxwedana xwe xurt kiriye û meşa xwe ya ber bi azadiyê ve domandiye. Her sal agirê Newrozê dê yekitiya gelê me xurtir bike û bibe sembola biryardariya me ya parastina pêşeroja hevpar.”
Hat destnîşankirin ku Newroz her sal ji bo gelê Kurd dibe qadên bilindkirina daxwazên azadiyê û demokrasiyê û axaaftina xwe wiha domand: “Mîrata dîrokî ya Newrozê têkoşîna me ronî dike û çanda berxwedanê ya gelê me zindî digire. Di vê çarçoveyê de, Pêvajoya Aştî û Civaka Demokratîk ku di 27’ê Sibata 2025’an de ji aliyê Serokê Gelê Kurd Abdullah Ocalan ve hat destpêkirin, sala xwe ya yekem temam kir. Gelê Kurd di vê pêvajoyê de li pişt îradeya xwe ya siyasî sekinî û piştgirî da veguherîneke demokratîk. Tevî girîngiya rolê Parlamentoyê, raporên hatine weşandin hêj jî bersivê nade hêviyên gelê Kurd û hêj pêdivî ye gavên qanûnî û destûrî yên şênber werin avêtin.”
DIVÊ AZADIYA RÊBER APO WERE MISOGERKIRIN
Di daxuyaniyê de bal kişand ser banga Rêber Apo ya Aştî û Civaka Demokratîk û ev tişt gotin: “Misogerkirina şert û mercên azadiya fîzîkî û xebata azad a Birêz Ocalan, ku serkêşê pêvajoya aştiya birûmet e, ji bo pêşxistina çareseriya demokratîk û aştiya mayînde pêdiviyeke dîrokî ye. Li ser vê bingehê, em ê di vê Newrozê de têkoşîna azadiyê di pêvajoya Aştî û Civaka Demokratîk de bêtir bihêztir bikin. Di vê têkoşînê de em dizanin jin pêşeng in. Ruhê berxwedana Rahşan, Ronahî, Zekiye û Bêrîvanan îro bi felsefeya “jin, jiyan, azadî” dibe sembola azadiyê ji bo jinên cîhanê jî. Ev têkoşîn li dijî serdestiya mêr û pergala dijminê jinan radiweste û bingehên civakeke demokratîk jî xurt dike. Em ê li dijê çanda kujerên kastîk ji bo serdemekê nû agirê Newrozê gur bikin. Jiyana nû, hevpar û azad em ê bi hev re ava bikin.”
Di daxiya daxuyaniyê de banga tevlêbûna Newroza Wanê hat kitin û wiha bi dawî bû: “Em bang li jin, ciwan, kedkar û hemû gelê azadîxwaz dikin ku di pîrozbahiyên Newrozê de li hev bicivin, têkoşîna ji bo yekîtî, azadî, demokrasî û wekheviyê xurt bikin. Em ê 17’ê Adarê li Erdişê Newrozê piroz bikin. 22’yê Adarê jî li ber kêleka Keleha Wanê, li qada newrozê bi beşdarbûna sed hezaran ve em ê Newroza Wanê pîroz bikin. Newroza îsal ji bo me li gel cejna Remezanê dibe du cejn.”
Hevserokê Giştî yê DEM Partiyê Tuncer Bakirhan, Veysî Aktaş, Aktivîsta TJA’yê Derya Aslan beşdarî pîrozbahiyê bibin. Her wiha Koma Agirê Jiyan û Koma Rojhilat wê derkevin ser dikê.
Piştî daxuyanî û axaftinan agirê Newrozê hat pêxistin û gel bi dahol û zirneyê li dora agir govend gerand.
