Ji deşta Nînowayê agirê ku bi destê Kawayê Hesinkar ve hatibû pêxistin, li hemberî Dehaqan bibû serhildana herî mezin û textê desthilatariyê hatibû ruxandin. Agirê ku hatibû pêxistin çirûska wê ji ocaxa gelê Arî derketibû. Li çiyayên Zagrosan ji tevahî mirovahiyê ronahiyek şewq vedabû û li derdora xwe bîr û baweriya gelan dabû komkirin. Ji Kawayê Hesinkar heya Mazlum Dogan, cejna gelê Kurd bi wateya xwe ya dayîna jiyandin û rûmeta xwe parastinê ve dihate pîrozkirin. Ev cejn ji bo gelan û gelê Kurd bi wateya hebûn û nasnameyê ve radibû. Rêber APO beriya 53 salan li Bendava Çûbûkê ya Enqereyê meşa bi heybet a têkoşîna Tevgera Azadiyê di vê rojê de dabû destpêkirin.
Newroz xwe ji xweliya xwe jinûve afirandin û bi rihkirin e. Ev heqîqet xwe bi her awayî di sekna şoreşgerên Tevgera Azadiyê de şênber dike. Agirê ku îro li qûntara çiyayên Zagrosan hatibû pêxistin nîşaneya vê yekê bû.
Dîroka têkoşîna gelan ji serî heya dawî bi berxwedan û serhildanan ve dagirtiye. Carnan çiruskek ji tevahî civakan re dibe îlhama têkoşînê û civakan li ser lingan digire, carnan jî dibe bîra civakî û civak bi van yekan ve çand û nasnameya xwe diparêze. Beriya 2638 salan li hemberî civaka Kurdan, ango Medan, êrîşên herî dijwar pêk tên. Konfedarasyona Medan bi berpirsyariya dîrokî ve radibe û li hemberî tevahî êrîşan serî radike. Agirê ku bi destê Kawayê Hesinkar ve hatibû pêxistin ji civakan re bibû werçerxa jiyana azad. Dema sal dibe 1982, li zindana Amedê bi pêşengiya Mazlum Doganan ve ev agir carekî din tê pêxistin. Zindana Amedê ji bo Dehaqên hemdemî re dibe cihê binkeftinê û di şexsê Mazlum Doganan de rûmet û azadiya gelan bi berdêlên herî mezin ve tê bidestxistin. Rêber APO bi fikra jiyana azad ve roja Newrozê zêdetir bi wate û qîmet kir.
Îro li çiyayên azad, di şexsê Gerîlayên Azadiya Kurdistanê de hêza felsefe û birdoziya Rêber APO xwe ji her milî ve dida xuyakirin. Gerîlayan bi kelecaniya rojê ve tîrêjên Rojê pêşwazî kirin. Roj û agir ji bo gelê Arî tê wateya jiyanê. Bi hilbûna rojê ve gerîla bi kelecanî ketin nava liv û tevgerê. Ji çar milan ve dest bi amadekariyên pîrozbahiyê kirin. Di tevgerîna gerîlayan a di amadekariyên pîrozbahiyê de kelecaneke pir bi nirx xwe dida nîşandan. Bîra dîrokî li qada amadekariyê xwe ji her milî ve dida xuyakirin. Di nava amadekariyên şahiya Newrozê de gerîlayan ji bo amadekariyan nerînên xwe wiha parve kirin.
Gerîla Rênas Bawer di nirxandinên xwe de wisa got: “Wekî ku tê zanîn îro em di nava amadekariyên Newrozê de ne. Em ê sibê jî Newrozê pîroz bikin. Berî her tiştî em vê Newrozê li Rêber APO, gelê me yê li çar aliyên cîhanê cih digirin û tevahî gelan pîroz dikin. Ev roj ji bo me rojeke girîng e û me di demên bihûrî de dîmenên Rêber APO dîtin, vê yekê kelecaniya me hîn zêdetir bilind kir. Wêneyê Rêber APO yê herî dawî ji bo me kêfxweşiyeke mezin bû û me jê hêzeke pir mezin girt. Bi pêşketinên herî dawî ve girêdayî wateya vê rojê hîn zêde bûye û Rêber APO vê rojê ji bo me wek rojeke biwate ya têkoşînê dinirxîne. Em ê bi wesîleya wê rojê, têkoşîna xwe hîn zêdetir bilind bikin. Em ê bi têkoşîna xwe ve azadiya fîzîkî ya Rêber APO û yekîtiya gelê Kurd a di çar parçeyên Kurdistanê de bidin avakirin. Dîsa em vê rojê berî her kesî li Rêber APO û tevahî gelê xwe pîroz dikin. Wê ev coşa me hîn zêde bilind bibe.”
Gerîla Faraşîn Zagros jî derbarê vê rojê de nêrînên xwe wiha parve kir: “Wek Gerîlayên HPG û YJA STAR’ê em bi kelecanî amadekariyên Newrozê dikin û em di nava tevgereke pir mezin de ne. Îro amadekariyên ku tên kirin di encama keda Rêber APO û têkoşîna bi salan de hatiye meşandin de ava bûne. Em jî şopdarên wê têkoşîn û kedê ne. Ji bo wê jî em berî her tiştî vê rojê li Rêber APO, şehîdên şoreşê, gelê xwe û hevalên ku niha di nava van amadekariyan de cih digirin pîroz dikin. Newroz ji bo me gelê Kurd rojeke serhildanê ye, roja xwe gihandina serkeftin û azadiya Rêber APO û yekîtiya gelan e. Pêwîst e wek rojeke yekîtiyê were destgirtin û em bi xwe jî bi vî awayî digirin dest û xwe amade dikin. Gelê Kurd bi vê rojê ve li hebûn, nasname û çanda xwe xwedî derdikeve. Serhildanên ku di vê rojê de pêk hatine wek sembola Neteweya Demokratîk tên destgirtin û gel bi vî awayî pîroz dike. Li çar aliyên Kurdistanê ev roj bi kelecanî tê pêşwazîkirin. Em di wê baweriyê de ne ku wê ev roj dîsa me bigihîne serkeftinê. Xeyala her gerîlayekî eve ku em vê rojê bi Rêber APO re pîroz bikin. Dîsa em vê rojê li tevahî hevalan pîroz dikin.”
Mervan Botan di nirxandinê xwe de got: “Em wek gerîlayên azadiya Kurdistanê ji bo Newroza 2026’an di nava amadekariyan de ne. Me bi têkoşîna ku Rêber APO xwe gihandiye lutkeyê ve dest bi vê salê kir. Dîmenên Rêber APO yên ku gihîştin raya giştî hêz û morala me ya heyî hîn zêde bilind kir û em bi vê kelecanê ve amadekariyên Newroza 2026’an dikin. Em di serî de Newroza 2026’an li Rêber APO û tevahî gelê Kurd pîroz dikin. Bangawaziya Rêber APO ya di 27’ê Sibata 2025’an de pêvajoya Civaka Demokratîk û Aştiyê da destpêkirin. Bi pêşketina vê pêvajoyê re, ji bo ku em bikaribin ji her milî ve ji bangawaziya Rêber APO re bibin bersiv, wek mîlîtanên Rêber APO ji her milî ve amade ne ku erkên xwe bi cih bînin. Ji bo ku têkoşîna Rêber APO bigihîje serî, em wek gerîlayên azadiya Kurdistanê ji her milî ve amade ne. Daxwaza me eve ku em di welatekî azad de bi Rêber APO re jiyan bikin. Ji bo vê jî têkoşîna ku tê xwestin em ê bidin û bi rihê Newrozê ve em ê hîn zêde bilind bikin.”
