Bi sedan şêniyên kantona Firatê bi merasîmeke bi heybet şervanê Hêzên Komandos Rêbez Aşmê (Mihemed Hemo) ku di 9`ê Hezîrana 2025`an de li Kobanê, her wiha şervanê QSD`ê Abû Casim El Reqawî (Ebdilqadir Şêx Osman) ku di 10`ê Hezîrana 2025`an li Reqayê şehîd bibûn, oxir kirin.
Merasîmê bi rêzgirtinê dest pê kir û endama Meclîsa Jinan a Partiya Yekitiya Demokratîk (PYD) Bedîa Miho sersaxî ji malbatên her du şehîdan re xwest û soza şopandina rêya wan da.
Bedîa Miho, diyar kir ku şehîd ji bo gel û axa xwe têkoşiyan got: “Şehîd Rêbaz û Abû Casim El Reqawî bê dudilî ji bo ku axa xwe û gelê xwe ji dijminê hov biparêzin her tim têkoşîn kirine. Divê em jî xwedî li mîrasa şehîdên xwe derkevin û rêya wan bişopînin.”
Endamê Meclîsa Leşkerî ya Kobanê Mehmûd Mehmûd, jî destnîşan kir ku ew ê her tim xewn û xeyalên şehîdên xwe bişopînin û soza şopandina rêya şehîdan nû kir û got: “Şehîd Rêbaz û Abû Casim El Reqawî her tim ji bo parastina axa xwe têkoşiyan. Şehîdên me xwedî dilên pak in û her tim ji bo azadiya gelê xwe li ber xwe didan. Em ê jî wek Meclîsa Leşkerî her tim şopdarên şehîdên xwe bin û em careke din soza xwe ji bo têkoşîna heta serkeftinê nû dikin.”
Piştî axaftinan wesîqeyên her du şehîdan hatin xwendin û radestî malbata wan kirin. Cenazeyên şehîdan bi dirûşmên “Şehîd namirin” spartin axê.
