Girtiyê bi nexweşiya giran Mehmet Emîn Çam ku herî dawî li nexweşxaneyê teşhîsa weremê lê hate danîn, li gel bang û serlêdanan jî nayê berdan. Çam rojê 17 dermanan dixwe, gelek nexweşiyên kronîk lê der bûne û ketiye wê rewşê ku nikare malbata xwe jî nas bike. Daxwaza taloqkirina înfaza cezayê Çam ji ber raporên “Dikare li girtîgehê bimîne” yên Saziya Tipa Edlî (ATK) têne redkirin. Endamê Konseya Navendî ya Yekîtiya Tabîban a Tirk (TTB) Mehmet Şerîf Demîr bernedana Çam nirxand û got, “Mixabin yek ji astengiyên herî mezin ên li pêşiya bernedana girtiyên nexweş raporên ATK’ê ne û nêzîkatiya ATK’ê jî gelek caran dûrî ji zanistiyê ye.”
Demîr diyar kir ku ji ber pirsgirêkên tenduristiyê yên mirovekî temendirêj nikare li girtîgehê bimîne û destnîşan kir ku ev kes ji ber nexweşiyan nikare jiyana xwe bi xwe dewam bike. Demîr ragihand ku Çam nexweşek e ku pêwîstiya wî timî bi alîkariyê heye, divê bi rêk û pêk bê şopandin û destnîşan kir ku ragirtina am li girtîgehê binpêkirina mafê tenduristî û jiyanê ye.
Demîr têkildarî mercên girtîgehê û raporên têne dayin axivî û anî ziman ku di asta heyî de rapora “dikare li girtîgehê bimîne” dûrî ji daneyên zanistiyê ye. Demîr di dewama axaftina xwe de got, “Mercên girtîgehê yên li Tirkiyeyê li pêşiya tenduristiya mirovekî bi tenduristiyeke baş jî astengiyeke cidî ye; ragirtina mirovekî ku ewqas nexweşî lê der bûne meseleya binpêkirina mafê jiyanê ye, pirsgirêkek tenduristiyê ye. Ji ber vê jî divê tedawiya wî bi lez bê kirin. Pêwîstiya wî bi alîkariyê heye. Ji bo karibe aktîvîteyên rojane dewam bike divê yek pê re be. Her wiha divê li nexweşxaneyê bê dermankirin. Lewma heta ku li girtîgehê bê ragirtin ev yek wê binpêkirina mafê jiyanê be û dikare bibe sedema pirsgirêkên tenduristiyê yên hîn cidî.”
Demîr destnîşan kir ku mafê dermankirinê divê neyê astengkirin û got, “Bi navê TTB’ê, weke rêxistinên ked û pîşeyî yên tenduristiyê, weke doktoran em timî dibêjin; Cezayê mirovekî çi dibe bila bibe, kî dibe bila bibe divê astengiyên li pêşiya mafê tenduristiyê ji holê bê rakirin. Ev ji bo girtîgehê jî derbas dibe. Li girtîgehê jî be divê astengiyên li pêşiya mafê jiyan û tenduristiyê ji holê bêne rakirin. Ev yek hem mafekî destûra bingehînî ye, hem jî berpirsyariya dewletê ya li pêşberî welatiyên xwe ye. Di vir de li pêşiya berdana girtiyên bi nexweşiya giran yek ji pirsgirêkên herî cidî ATK ye. Raporên ATK xala diyarker a vê pêvajoyê ye. Lê mixabin li pêşiya berdana girtiyên nexweş astengiya herî mezin raporên ATK’ê ye û nêzîkatiya ATK’ê jî gelek caran dûrî ji zanistê ye.”
Di dawiya axaftina xwe de Demîr ev bang kir: “Divê hemû şert û mercên ku tenduristiya mirovan xera dike ji holê bêne rakirin. Herî dawî divê mirov destnîşan bike; jiyan pîroz e. Di nava ti mercî de divê li pêşiya mafê tenduristiyê astengî nebe. Mafê tenduristiyê qenciyeke tê dayin nîne, mafekî bingehîn e û di nava her şert û mercî de divê bê bicihanîn.”
