Cenazeyê helbestvanê Kurd Ehmed Huseynî li Amedê piştî merasîmekê ber bi Rojava ve hate birêkirin.
Ji bo Huseynî ku 10’ê Adarê li Swêdê ji ber kanserê jiyana xwe ji dest da li Navenda Kongreyê ya ÇandAmedê merasîm hate lidarxistin. Hevrêyên Huseynî, nûnerên partiyên siyasî û rêxistinên civakî jî di nav de gelek kes beşdarî merasîmê bûn.
Darbesta Ehmed Huseynî bi rengên kesk, sor û zer hate xemilandin, wêneyên wî hatin nîşandan û qurnefîl danîn ser darbesta wî.
Li merasîmê di axaftinan de qala keda Huseynî ya ji bo ziman, helbest û wêjeya Kurdî hate kirin û hate ragihandin ku bi berhem û têkoşîna xwe wê bê bîranîn. Hunermend Şêrko Kanîwar got, “Hevalên te li ser şopa te ne, xeman nexwe.”
Hevşaredarê Bajarê Mezin ê Amedê Dogan Hatûn jî diyar kir ku Huseynî ji bo gelê Kurd nirxekî hêja ye û bi taybetî bal kişand ser dilsoziya wî ya ji bo Rojava.
Hevberdevka Komîsyona Çand, Huner û Ziman a DEM Partiyê Cemîl Tûrhalli jî Huseynî weke mirovekî têkoşînê û helbestvanekî Kurdî û gelê xwe pênase kir.
Hevberdevkê Înîsiyatîfa Yekîtiya Demokratîk Mehmet Kamaç jî got, “Oxir be ji te re mirovê bedew. Gelê Kurd, zarokên gelê Kurd wê ti carî te ji bîr nekin.”
Hevseroka PEN a Kurd Rojbîn Perîşan jî got, “Em ê paşerojeke azad û yekîtiyê ava bikin û diyarî te bikin. Em ê te ti carî ji bîr nekin.”
Nivîskar Rizoyê Xerzî ku hevalê 40 salan ê Huseynî ye got, “Ehmed stêrk û ronahiya wêjeya Kurd e. Nemir, tenê cih guhert. Jiyana xwe da Kurdî û wêjeya Kurd.”
Piştî merasîmê cenazeyê Ehmed Huseynî ji bo di ser Deriyê Sînor ê Xabûrê re bê derbas kirin, ber bi Rojava re hate şandin.
