Li navenda Şirnexê, bi wesîleya Hefteya Lehengiyê bernameyeke bîranînê hat lidarxistin. Bîranîna ku bi pêşengiya MEBYA-DER’ê hat kirin, nûnerên partiyên siyasî, rêxistinên girseyî yên demokratîk û gelek welatî beşdar bûn. Di bîranîna ku li avahiya Partiya DEM’ê ya Şirnexê hatî kirin de, wêneyên Bişeng Anık a ku di Newroza Şirnexê ya sala 1992’an de ya ku wekî “Newroza Berxwedanê” derbasî dîrokê bûye hatibû qetilkirin û wêneyê Mahsum Korkmaz (Egîd) ê ku yek ji kadroyên pêşeng ên PKK’ê ye û 15’ê Tebaxa 1984’an de li navçeya Dihê ya Sêrtê çalakiya yekemîn a çekdarî pêk anîbû, li ser masê hatin danîn. Li ber wêneyan bi findan “1948-92” hat nivîsandin.
Bîranîn bi deqeyeke rêzgirtinê dest pê kir. Hevseroka MEBYA-DER’ê ya Şirnexê Emine Akış di bîranînê de axivî û diyar kir ku bi saya berdêlên îro hatine dayîn, bi milyonan kes Newrozê pîroz dikin. Piştre ji bo bîranîna şehîdên têkoşîna azadiya Kurdistanê sînevîzyonek hat nîşandan. Di bîranînê de gelek caran dirûşmên şehîd namirin hatin berzkirin. Hevseroka Partiya DEM’ê ya Navçeya Navendî ya Şirnexê Esma Erener jî helbesta ku ji bo bîranîna Bişeng Anık hatibû nivîsandin xwend.
Parlamenterê Partiya DEM’ê yê Şirnexê Mehmet Zeki İrmez jî wisa got: “Di têkoşîna azadiya Kurd de her yekî ji wan ji bo mezinkirina berxwedanê berdêlên giran dan. Canê xwe dan. Her hevalê me yê ku di vê hefteyê de jiyana xwe ji dest daye ji bo me bi qîmet e. Divê em wan ji bîr nekin. Bişeng bû Newroz. Em dema zarok bûn bi çîrokên lehengtiya wê mezin bûn. Navê bi dehan zarokan bû Bişeng. Heta ku gelê Kurd hebe, ew ê jî hebin.”
Piştî bîranînê gorên şehîdan hatin ziyaretkirin.
MÊRDÎN
Bi pêşengiya MEBYA-DER’a Mêrdînê, li Goristana Hecacî ya Nisêbînê bîranîn hat lidarxistin. Nûnerên partiyên siyasî, rêxistinên demokratîk û gelek welatî beşdarî bîranînê bûn û gorên şehîdên têkoşîna azadiyê ziyaret kirin. Hevserokê MEBYA-DER’a Mêrdînê Salih Kuday piştî rêzgirtinê axivî û destnîşan kir ku ew ê her tim xwedî li nirxên xwe derkevin. Parlamentera Partiya DEM’ê ya Mêrdînê Beritan Guneş Altın jî diyar kir ku bi saya berdêlên şehîdan gelek destkeftî hatine bidestxistin û got ku ew ê ala têkoşînê heta serkeftinê hildin.
