MKG’ê rapora meha Adarê weşand

Komeleya Rojnamevanên Jin a Mezopotamyayê (MKG), rapora binpêkirina mafên jinên rojnamevan a meha Adarê eşkere kir. 
 
Navaroka rapora MKG’ê bi vî rengî ye:
 
Di tevahiya meha Adarê de, binpêkirinên li dijî rojnamevan û xebatên rojnamevaniyê careke din zextên berdewam ên li ser azadiya çapemeniyê eşkere kirin. Binçavkirin, gef, lêpirsîn, doz, astengkirinên li dadgehê, destwerdanên polîsan ên li qadê, her wiha sansura dîjîtal nîşan dan ku çalakiyên pîşeyî yên rojnamevanan bi zextên piralî rû bi rû dimînin.
 
Binpêkirinên di meha Adarê de nîşan dan ku rojnamevanî her ku diçe ne wekî mafê agahdarkirina raya giştî, lê wekî qadeke destwerdana dadwerî û îdarî tê dîtin. Ragihandina nûçeyan, şopandina pêşketinên civakî, ragihandina daxuyaniyên çapemeniyê û parvekirina agahiyên ji qadê vê mehê jî bû hedef. Ev hedefgirtin jî rasterast mafê agahdarkirina raya giştî têk dibe.
 
Sînordarkirinên li ser rojnamevanan, bi taybetî li eywanên dadgehê, destwerdanên polîsan ên li qadê û sînordarkirinên gihîştina platformên dîjîtal, nîşan didin ku zexta li ser çapemeniyê ne tenê bi qadekê tenê ve sînordar e, lê bi awayên hevdu temam dikin, dewam dike. Van binpêkirinên ku rojnamevanên jin hedef digirin, şert û mercên xebatê bêtir nebaş kirine, cîhê çapemeniya rexnegir û azad teng dike.
 
Rewşa ku di meha Adarê de derket holê nîşan dide ku zextên li ser rojnamevanan ne bûyerek bi tena serê xwe ye, lê belê siyasetek berdewam e. Ji bo ku rojnamevan bikaribin bi azadî, ewlehî û di şert û mercên wekhev de bixebitin, pir girîng e ku ev binpêkirin werin dîtin, werin belgekirin û têkoşîna kolektîf a ji bo parastina azadiya çapemeniyê were berfirehkirin.”
 
Li gorî binpêkirinên di raporê de cih girtine, rojnamevanek hatiye binçavkirin, gef li rojnamevanek hatî xwarin, derbarê du rojnamevanan de lêpirsîn hatî destpêkirin, derbarê du rojnamevanan de doz hatine vekirin û ceza li du rojnamevanan hatiye birîn. Darizandina 7 rojnamevanan didome û 5 rojnamevan hê girtîne. Malperek û 41 hesabên medyaya civakî hatin girtin. Xwegihandina 13 platformên medyaya civakî jî hatin astengkirin.