Piştî pêlê êrîşan a li ser Bakur û Rojhilatê Sûriyeyê, bi hezaran şervanên Kurd ji aliyê Hikumeta Demkî ya Sûriyeyê de dîl hatin girtin. Hîn ji wan agahî jî nayên wergirtin. Şêniyên bajarê Kobanê ji ANF’ê ra axivîn û gotin ku çavê wan li riya zarokên wan e.
Hevjîna Dîlgirtî Çekdar Berxibatan, Bêrîvan Osman diyar kir ku ew li benda hevjînê xwe ye û ev nêzî 4 meh in agahî jê nayê wernagirtin û got: “Ew li Dêr Hafirê dîl hat girtin, em ji rewşa wî bi guman in. Em digerin, lê em wan nabînin, em êdî dixwazin rewşa hevjînê xwe nas bikin. Em şervanên xwe dixwazin, ez dîlgirtiyan bi giştî dixwazin. Dîmenê xwe di kemînê de ji me ra şand. Dîmenê dawî jî tenê ew dibêje ew dixwazin min ji erebeyê daxin. Ji wî dîmenî şûnde agahiya me bi giştî jê qut bû.”
Zaroka bi navê Êlîn Şêx Behai ku birayê wê Mihemed Şêx Behai dîl hatiye girtin wiha got, “Ev bû 4 meh in çavê me li riya birayê me ye. Êdî em dixwazin birayê min û hevalên wî derbikevin, bila vegere mal. Ev bû 4 meh in her dixwazim birayê min were, birayê min her di nava mejiyê min de ye û ji mejiyê min dernakeve. Bila êdî birayê min berdin.”
Dayîka bi navê Yaşer Ehmed ku kurê wê Mihemed Wêso Elî dîl hatiye girtin, ev tişt got: “Ez dixwazin her kes dengê min bibihîze, kezeba me şewitî, ez dixwazim êdî van êsîrên me berdin, çavê me hemûyan li riya wan e. Kezeba me êdî dişewite. Ew di zindanê de ne û tu agahiyê me ji wan tune ye.”
