Navenda Ragihandinê ya Yekîneyên Parastina Gel (YPG) bi boneya salvegera 9’emîn a êrişa dewleta Tirk a dagirker a li ser çiyayê Qereçoxê kir ku di encamê de 20 şervan û nûçegihanên şer şehîd bûn, daxuyaniyek nivîskî weşand.
Daxuyanî wiha ye:
“Di qonaxa ku hêzên me yên parastinê li seranserî axa Sûriyeyê li dijî çeteyên DAÎŞ’ê operasyonên rizgarkirinê pêk dianîn, ji aliyê dewleta Tirk a dagirker ve Çiyayê Qereçoxê ango biryargeha YPG-YPJ, Navenda Ragihandina YPG, Navenda Radyo Rojava û gelek saziyên leşkerî bi balafirên şer ve di dîroka 25’ê Nîsana 2017’an de, di saetên sibehê de hatin hedef girtin. Di vê êrîşê de 3 endamên ragihandina YPG-YPJ jî di nav de 20 fermandar û şervanên di têkoşîna rizgariya Kurd û mirovahiyê de pêşengtî kirin û di têkbirina çeteyên DAÎŞ’ê de rolên mezin pêk anîbûn gihaştin şehadetê. Her wiha 18 fermandar û şervan jî birîndar bûn.
Li seranserî şoreşa Sûriyeyê şoreşa Rojavayê Kurdistanê her tim bi êrîşên ji derve bûye hedef. Ji komên çete yên El Nusra heta DAÎŞ’ê têkoşîneke dijwar hatiye meşandin. Bi taybet ew rêxistina terorî ya DAÎŞ’ê ku ji bo tevahiya cîhanê metirsiyeke mezin ava kiribû, di erdnigariya Iraq û Sûriyeyê de gelek deverên stratejîk bi dest xistibû û hemû mirovahiyê tehdîd dikir. Şervanên YPG-YPJ-QSD wekî mertalên li beramberî ev rêxistina terorî sekinî û di serî de li Kobanê di erdnigariya Rojavayê Kurdistanê de binkeftinê bi wan bide jiyîn. Ev wêrekî û fedekariya şervanên şoreşa Rojava gav bi gav li seranserî axa Sûriyeyê belav bû û ber bi paytexta xîlafeta DAÎŞ’ê Reqayê ve çûn. Di van qonaxên dîrokî ku çavê tevahî cîhanê li ser operasyona şervanên YPG-YPJ-QSD’ê ku bêtirs bi ser DAÎŞ’ê de diçû, dewleta Tirk a dagirker li pêş çavê cîhanê êrîşî navenda birêvebirina operasyonê bi xwe kir. Qereçox, ku biryargeha navendî ya YPG-YPJ, navenda Ragihandina YPG, Radyo Rojava û saziyên leşkerî bû, di serî de ji ber îmhakirina navenda birêvebirina şerê li dijî DAÎŞ’ê û tevahî xebatên ku vî şerî bi cîhanê dide nasîn hatin armanckirin. Bi zêdetirî 25 balafirên şer ên dewleta dagirker a Tirk Çiyayê Qereçoxê hate bombebarankirin û hemû hêzên heyî rengê xwe yê li beramberî şerê li dijî DAÎŞ’ê diyar kirin.
Di vê êrîşê de her çiqas armanc têkbirina destkeftiyên şoreşa Rojava û rawestandina şerê li dijî DAÎŞ’ê bû daku DAÎŞ binkeftinê jiyan neke, lê hêzên YPG-YPJ-QSD û tevî saziyên hatine hedefgirtin hîn xurtir xebatên xwe domandin. Ew DAÎŞ’ê ku ji mirovahiyê re xeteriya herî mezin bû, binkeftina wê wekî diyariyekî ji aliyê şervanên şoreşa Rojava ve ji mirovahiyê re hate dayîn. Di wê demê de jî tola şehîdan li erdê nema. Bi armanca parastina deskeftiyên şoreşê gav bi şûnde nehat avêtin, jiyana gelên me hate parastin û wê roja îro jî bi heman rengî gel û destkeftî werin parastin. Di çerçoveya parastina deskeftiyên şehîdên xwe de em ê bi armanca xwe ya jiyana azad û Sûriyekî demokratîk gav bi şûnde neavêjin.
Em şehîdên Qereçoxê bi bîr tînin, li hemberî ked û fedakariyên wan rêzdariya xwe nîşan didin û di kesayeta wan rêhevalên xwe de tevahî şehîdên şoreşê, bi soza pêkanîna xeyalên wan bi bîr tînin.”
