Malpera Dengê Binçavkiriyên Kurd û Îranî têkildarî rewşa dayî ya li girtîgehên Îranê û zextên li ser girtiyên siyasî yên jin ên li girtîgeha Evînê raporek belav kir.
Di raporê de hate diyarkirin ku zextên dewleta Îranê yên li ser girtiyên siyasî yên jin ên li girtîgeha Evînê zêde bûne. Hate ragihandin ku berpirsê girtîgehê fermaneke nû derxistiye ku girtiyên jin nikarin beşdarî kampanya ‘Sêşemên Na ji Darvekirinê re’ bibin û hişyarî li ser encamên beşdarbûna wê daye.
Malperê da zanîn ku di fermanê de hatiye diyarkirin eger girtî beşdarî çalakiyên wek grev, berzkirina dirûşmeyan û kombûnan bibin, dê bên veguheztina hucreyên yek kesî û di heman demê de dê ji mafê peywendiya telefonê ya bi malbatan re bêpar bimînin.
Di rapora malpera Dengê Binçavkiriyên Kurd û Îranê de hate tekezkirin ku hucreyên yek kesî bi awayekî berfireh weke amûreke zextê li ser girtiyan tê bikaranîn û wek bersiva çalakiyên nerazîbûnê tên bikaranîn ku ev jî nîşaneya hewldana ji bo avakirina tirs û kontrolkirina di hundirê girtîgehê de ye.
