Li gorî anketa nû, piştgiriya raya giştî ya ji bo Donald Trump her ku diçe kêm dibe. Di lêkolîna ku ji hêla Washington Post-ABC News-Ipsos ve hatiye kirin de, rêjeya nepejirandina Trump derket ji sedî 62’yê, ku ev di her du serdemên serokatiya wî de rêjeya herî bilind e.
Di anketa ku şeş meh beriya hilbijartinên navberê yên DYA’yê yên meha Mijdarê hat weşandin de, rêjeya pejirandina giştî ya Trump di ji sedî 37’an de ma. Bi taybetî piştî şerê ku li dijî Îranê hatiye destpêkirin, zêdebûna mesrefên jiyanê û pirsgirêkên aborî wekî qadên herî qels ên serok derketin pêş.
Ji sedî 76’ê beşdaran polîtîkayên Trump ên derbarê lêçûnên jiyanê de nepejirandin, tenê ji sedî 23’yan piştgirî da. Di sernavê polîtîkaya derve de jî tabloyeke neyînî bal kişand; piraniya Amerîkayiyan awayê rêvebirina şerê Îranê rexne kir. Li gorî anketê, du ji sê parên gel di wê baweriyê de ne ku welat ber bi rêyeke xelet ve diçe.
Her çend di nav hilbijêrên komarparêz de piştgiriya ji bo Trump di asteke bilind de bimîne jî, di rêjeya piştgiriya xurt de kêmbûn hat dîtin. Di nav hilbijêrên serbixwe de jî rêjeya pejirandinê heta ji sedî 25’an daket.
Di performansa Trump a li ser polîtîkayên koçberî û sînor de, her çend li gorî qadên din encam hinekî bilindtir bin jî, di vê mijarê de jî piraniya piştgiriyê nehat dabînkirin.
Encamên anketê nîşan didin ku piraniya kêm a komarparêzan a di Meclîsa Nûneran de dibe ku di bin rîskê de be. Di nav hilbijêrên qeydkirî de Demokrat di pirsa tercîha ji bo hilbijartinên kongreyê de pênc puan ketin pêş. Di nav hilbijêrên ku ji dengdana xwe bawer in de ev cudahî heta neh puanan dertê.
Lêkolînê her wiha eşkere kir ku li dijî hin polîtîkayên Trump muxalefeteke berfireh heye. Di nav van de sînordarkirina mafê hemwelatiya bi jidayikbûnê, qutkirina fonên lêkolînên bijîşkî û pêkanînên li dijî koçberan hene.
Beşeke mezin a beşdaran Trump wekî kesekî “rastgo û pêbawer” nabînin, her wiha beşekî girîng jî fikarên xwe yên derbarê kapasîteya wî ya birêvebirina wezîfeya serokatiyê de anîn ziman.
