Li dijî Santrala Enerjiya Jeotermal (JES) ku tê xwestin, li navçeya Gimgim a Mûşê bê çêkirin, berxwedana gel dewam dike. Şêniyên navçeyê ragihandin ku wê destûrê nedin projeyê ku wê bandorê li 16 gundan bike û qadên jiyanê tine bike. Lewma piştî meşa girseyî li qada ku tê texmînkirin ku şîrket meha Gulanê lê sondajê bike, dest bi çalakiya nobedê ya li binê kon kirin. Nobeda ku 3’ê Gulanê bi pêşengiya jin û ciwanan destpê kir, 24 saetan dewam dike. Gundî li gel sermayê û mercên din ên neyînî yên hewayê jî qadê naterikînin. Gundî bi dorvegerî nobedê digirin û bi vî rengî dixwazin li pêşiya sondajê bibin asteng.
‘HER TIŞT JI BO PAŞEROJEKE PAQIJ’
ji şêniyên navçeyê yên ji ajansa me re axivîn diyar kirin ku karên jeotermalê zerarê dide xwezayê û qadên jiyanê û banga piştevaniyê kirin. Ji çalakgeran Hasan Yorgûn diyar kir ku li dijî karên jeotermalê wê çalakiya xwe ya nobedê dewam bikin û got, “Ji bo pêşî li Jeotermalê bigirin em li vê derê ne. Em ê bi hemû hêza xwe bixebitin. Ji bo ev proje nekeve meriyetê çi pêwîst be em ê wê bikin. Ez ê li gel vî temenê xwe bi şev û roj li vê derê bim. Ji bo çi? Ji bo wê yekê ku em û zarokên me li cihekî paqij bijîn. Em ji bo vê têdikoşin û em ê têbikoşin. Ev xak a me ye û em ê ji kesî re nehêlin. Em zanin bê jeotermal çiqasî nebaş e. Em li dijî razemeniyeke erênî nînin. Lê belê em ti bûyera ku zerarê bide gel, xwezayê qebûl nakin.”
‘EM Ê BI DEWAMÎ LI VÊ DERÊ BIN’
Denîz Onder jî anî ziman ku konê wan konê berxwedanê ye û got, “Bi gel re di nava mercên zehmet ên baranê de me konê xwe vedan. Em ê çend konên din jî vedin. Doh me nobeda xwe ya destpêkê li binê kon girtin. Em ê vê çalakiya xwe bi nobeda bi dorvegerî dewam bikin. Bila her kes piştgiriyê bide me. Weke ku hevalên me yên li gundên derdorê gotin, mirovên me yên ji bajarên derdorê, ji metropolan bên, gelê me divê piştgiriyê ji me re bikin. Weke ku hûn jî dibînin, xwezaya me bedew e. Ji bo xwedîderketina li vê xwezayê me li vê derê ne. Em ê bi dewamî li vê derê bin.”
‘EM DIXWAZIN TÊKOŞÎNÊ BERFIREH Û BELAV BIKIN’
Sila Yildiz jî destnîşan kir ku konê wan ê destpêkê bi piştevaniyê ava bû û got, “Doh me li vê derê konê xwe yê destpêkê danîn. Dewama konan wê îro û sibe bê. Kon ji aliyê gel ve bi piştevaniyê hate danîn. Ji bilî vê jinên me yên li gund jî bi xwarinê piştgiriyê dikin. Gelê me ji destpêkê ve li ber jeotermalê radibe û îro her kes di nava piştgiriyê de li vê derê ne. Daxwaza me ew e ku bi vî rengî dewam bike û em vê yekê bigihînin gund û bajarên derdorê. Di vê mijarê de em li benda piştgiriya he rkesî ne.”
‘TÊKOŞÎNEKE BI RENGÊ KOMÎNÊ TÊ DAYIN’
Sila Yildiz ragihand ku piştgiriya li herêmê mezin bûye û axaftina xwe bi vî rengî dewam kir, “Bi rastî jî karekî bê navber tê kirin. Jin, mêr, extiyar ciwan bi rastî jî gelek kar têne kirin. Vedana kon jî bû mînakeke bedew ji rastiya yekbûn û yekîtiyê. Di vir de mînakeke bedew a piştevaniyê hate nîşandan. Weke ku me ji destpêkê ve got, em li vê qadê tekez li dijî sondajê ne.”
‘EM LI BENDA PIŞTGIRIYA HER KESÎ NE’
Sila Yildiz işareat bi çalakiya kon a doh kir û got, “Di çalakiya kon de ku doh hate vedan, mercên hewayê bi rastî jî gelekî xerab bû. Hem ba hemû hem jî baran. Lê belê li gel vê yekê jî hevalên me dest jê bernedan. Em dixwazin vê piştevaniyê mezin bikin. Di vê mijarê de em li benda piştgiriya her kesî ne.”
