Bi pêşengiya Komeleya Çand û Hunerê ya Anavarzayê, di çarçoveya 15’ê Gulanê Cejna Zimanê Kurdî de, li Parka Îsmetpaşa ya li taxa Îsmetpaşa ya navçeya Seyhan a Edeneyê şahiyek hat lidarxistin.
Hevserokê Giştî yê Partiya Herêmên Demokratîk (DBP) Keskin Bayindir wekî axivêr beşdarî şahiyê bû. Her wiha endamên pêkhateyên Platforma Saziyên Demokratîk a Edeneyê û gelek welatî di çalakiyê de amade bûn.
Şahî bi deqeyeke rêzgirtinê ya bi marşa “Çerxa Şoreşê” dest pê kir û girseya gel di dema şahiyê de gelek caran dirûşmeyên “Bijî Serok Apo” berz kirin.
DIVÊ EM JI XWE Û ZIMANÊ XWE BAWER BIN
Bayindir piştî rêzgirtinê axivî, Cejna Zimanê Kurdî ya 15’ê Gulanê li gel pîroz kir û bal kişand ser girîngiya zimanê dayikê. Bayindir diyar kir ku li gorî lêkolînên zanistî kurdî di nav 8 zimanên herî dewlemend ên cîhanê de cih digire û wiha got: Em ji xwe û zimanê xwe bawer bin. Avakarên ziman dayik in. Zimanê me bi saya keda dayikan gihîştiye vê astê.
HER MALEKÊ BIKIN DIBISTANEKÊ
Bayindir di berdewamiya axaftina xwe de destnîşan kir ku divê park, qad û kolan veguherin qadên hînbûna Kurdî û bang kir ku li her derê bi kurdî biaxivin û kurdî hînî zarokan bikin.
Piştî axaftinê dîwana dengbêjan û hunermendên Komeleya Çand û Hunerê ya Anavarzayê derketin ser dikê. Çalakî bi gerandina govendê bi dawî bû.
