Li girtîgehan binpêkirina mafên mirovan a li girtiyan û malbatên wan dewam dike. Yek ji girtîgehên ku ev binpêkirin lê zêde ye Girtîgeha bi Ewlekariya Bilind a Ereglî ya Konyayê ye. Li girtîgehê veguhestina ji bo nexweşxaneyê, hevdîtina malbatan veguheriye êşkenceyê. Lutfîşah Kelekçîer ê 29 sal in girtî ye, bi rêya telefonê bi malbata xwe re axivî û qala kiryarên kêfî û zexta li girtîgehê ya hevdîtina dawî kir. Kelekçîer bang li parêzeran û parlamenteran kir ku li hemberî vê zextê serdana girtîgehê bikin.
Birayê Kelekçîer, Emrûllah Kelekçîer jî li ser zextên li kekê wî û wan bi xwe axivî. Kelekçîer destpêkê bal kişand ser pirsgirêkên tenduristiyê yên kekê xwe û got, “Li girtîgehê 2 caran krîza dil derbas kir. Di yek ji krîzê de ne bi hewldana doktoran, lê belê bi hewldana hevalên wî yên li koxûşê dilê wî jinûve lê da. Ji ber krîzan du caran anjiyo bû. Ji bilî vê nexweşiyên koletrol, hîper tansiyonê pê re hene. Li girtîgehê du caran ji piştê emeliyat bû. Ji ber ku girtîgeha ew lê tê ragirtin bi ewlekariya bilind e, hem em hem jî girtî zor û zehmetiyên mezin dikişînin.”
Kelekçîer diyar kir ku bi kêfî êşkence tê kirin, bi rengekî kêfî serdegirtin li koxûşan tê kirin, alavên taybet têne desteserkirin, daxwaza girtiyan a ji bo rakirina nexweşxaneyê tê redkirin, di dema lêgerînê de jî li girtiyan tê xistin û anî ziman ku ev kiryarên kêfî êdî bi rêk û pêk bûne.
Keleçîer her wiha bal kişand ser pirsgirêkên di hevdîtinên vekirî û girtî de xizmên girtiyan pê re rû bi rû dimînin û got, “Her wiha daxwaznameyên têne pêşkêşkirin li ber çavan nayê girtin. Di hevdîtina me ya dawî de got, ‘Ez girtiyekî 29 salan im, tiştekî bi vî rengî hat serê min. Ji wekîlan re bibêjin, bila bên binerin’ û banga piştevaniyê kir. Dema ku em diçin hevdîtinê, em hevdîtinê di qefesa cam de dikin. Her wiha dema ku danûstandineke devkî yan jî fîzîkî bi girtiyekî cuda re tê kirin, yekser cezayê hevdîtinê li girtiyan tê birîn. Ji bo ceza li kesî neyê birîn em silav nadin girtiyekî, yan jî lê jî nanihêrin. Her wiha em di lêgerîneke berfireh de derbas dibin. Dayika min 80 salî ye, carna lêgerîna tazî li wê jî ferz dikin.”
Di dawiya axaftina xwe de Kelekçîer banga piştevaniyê ya girtiyan dubare kir.
