Hevpeymaniya Hêzên Siyasî ya Rojhilatê Kurdistanê îro derbarê pêla nû ya darvekirinan li Rojhilatê Kurdistan û Îranê de daxuyaniyek weşand.
Di daxuyaniyê de ev tişt hatin parvekirin:
“Dewleta tepeserkirinê ya Komara Îslamî ji bo veşartina şikestinên xwe yên siyasî, leşkerî û ewlehî, li Îranê, bi taybetî li Rojhilatê Kurdistanê, pêlek nû ya darvekirin û girtina girtiyên siyasî daye destpêkirin.
Tawanên Komara Îslamî ya Îranê ku di van demên dawî de bi awayekî berbiçav zêde bûne û pêla nû ya tepeserkirin û tundiyê li dijî têkoşerên azadiyê, bi taybetî di girtîgehan de, ne normalin û divê destûr neyê dayîn ku wekî normal werin dîtin. Ev darvekirin û kuştinên siyasî kuştinên girseyî û rêxistinkirî ne û ji bo her kesî eşkere ye ku Komara Îslamî darvekirinan bikar tîne da ku civakê bêhtir bitirsîne û wekî mertalek ji bo mayîna li ser desthilatdariyê bikar tîne.
Zext û darvekirinên li welat û êrişên bênavber yên bi mûşekan li ser partiyên siyasî li Herêma Kurdistanê di demekê de zêde dibin ku rejîm di qada navnetewî û di pevçûna xwe ya bi Dewletên Yekbûyî yên Amerîkayê û Îsraîlê re rastî têkçûneke stratejîk û valahiyeke ewlehiyê ya kûrtir hatiye. Ji ber vê yekê, ew serî li afirandina qeyranan li derve û tundiya zêdetir li navxweyê welat daye.
Di heman demê de, berdewamiya tawanên Komara Îslamî di dema agirbesta demkî ya bi Dewletên Yekbûyî yên Amerîkayê û Îsraîlê re delîlek bê gûmane ku rejîmê şerê xwe yê li dijî azadîxwazan, çalakvanên mafên mirovan û dijberên navxweyî ranewestandiye. Di şûna wê de, hemû derfetek, nemaze agirbestê, bikar bîne da ku dijberên xwe ji hêla fîzîkî ve paqij bike.
DIVÊ DARVEKIRIN WEKÎ SÛCÊ LIDIJÎ MIROVAHIYÊ BÊ DÎTIN
Hevpeymaniya Hêzên Siyasî ya Kurdistana Îranê bawer dike ku cezayê darvekirinê ji bo kesên ku bi tohmetên bê bingeh yên ‘sîxurî’ ji bo biyaniyan an ‘şerê çekdarî’ li dijî rejîmê têne girtin, di rastiyê de çekek tolhildanê ye li dijî gelê têkoşer û mafxwaz. Di tevahiya temenê xwe de, vê rejîma kujer hewl daye ku bi darvekirina çalakvanên siyasî lêçûna têkoşîn û berxwedanê li dijî rejîma xwe ya tepeserker zêde bike û mafên netewên Îranî û tevgerên siyasî û sivîl binpê bike. Ji ber vê yekê, civaka navnetewî nikare darvekirina bi sedan girtiyan di salê de li Îranê tenê wekî ‘binpêkirina mafên mirovan’ bibîne. Di şûna wê de, divê van kiryaran wekî ‘tawanên şer’ û ‘tawanên li dijî mirovahiyê’ nas bike û li dijî van tawanên rejîmê tedbîr bigire.
Hevpeymaniya Hêzên Siyasî ya Kurdistana Îranê her wiha diyar dike ku her dîplomasî, her danûstandin û her cûre agirbestek bi Komara Îslamî re dê rê li ber bidawîhatina tundiya navxweyî ya li Îranê û darvekirin û binpêkirinên sîstematîk ên mafên mirovan ji aliyê vê rejîmê ve negire. Her wiha dê Komara Îslamî teşwîq bike ku siyaseta xwe ya kuştin û tunekirina gelên azadîxwaz bidomîne. Her wiha derfetek peyda dike ku temenê vê rejîma kujer û zordar dirêj bike.
DIVÊ KONSEYA EWROPAYÊ ZEXT Û DARVEKIRINAN BIXE ROJEVA XWE
Hevpeymaniya Hêzên Siyasî ya Kurdistana Îranê bang li Netewên Yekbûyî, Parlamentoya Ewropayê û hikûmetên demokratîk dike ku zextê li ser Komara Îslamî ya Îranê zêdetir bikin û têkiliyên dîplomatîk bi wê re rawestînin da ku ew ji berdewamiya sûcên xwe rawestîne. Divê mijara tepeserkirina navxweyî li Îranê û darvekirin jî di Konseya Ewlehiyê ya Netewên Yekbûyî de bibe mijarek bingehîn û divê biryarên dijwar li dijî rejîmê werin girtin. Bê gûman, heya ku lêçûna darvekirin û tundiya navxweyî li dijî Komara Îslamî ji hêla siyasî û aborî ve neyê zêdekirin, reftar û siyaseta rejîmê li navxweyî naguhere.
Her wiha Hevpeymaniya Hêzên Siyasî ya Kurdistana Îranê, bang li netewe û partiyên siyasî yên Îranê yên ku li dijî Komara Îslamî ne dike ku bi yekîtî û hevgirtinê ji polîtîkayên rejîmê paşve gav bidin avêtin. Em piştrastin ku gelê Kurd dê bi rêxistinkirina refên xwe û têkoşîn û berxwedana xwe wekî her carê bersiva polîtîkayên rejîmê bide.
Bijî têkoşîna rewa ya gelên Îranê ya ji bo azadî û edaletê.”
