Rojnamevana Başûrî Niyaz Abdullah diyar kir ku geşedanên ku li Rojhilata Navîn tên jiyankirin û hevsengiyên jeopolîtîk ên nû yên hêzên gerdûnî-herêmî, herî zêde bandor li ser Kurdan bike û anî ziman ku piştî geşedanên li Rojava, gefên li ser Başûr zêdetir tê dîtin.
Niyaz Abdullah diyar kir ku li gel krîzên ku ji ber geşedanên herêmî li herêma Kurdistanê çêdibin, krîzên ku rasterast jiyana gel bandor dike jî hene û li dijî zextên Bexdayê bang li hemû aktorên siyasî kir ku hesabên xwe yên teng ên partiyan bidin aliyekê û tavilê li dora stratejiyeke hevpar a navneteweyî bibin yek.
Niyaz Abdullah destnîşan kir ku Herêma Kurdistanê îro bi pirsgirêkên siyasî, aborî û îdarî yên cidî re rû bi rû ye û bilêv kir ku berjewendiyên partiyê, gendelî, rêveberiya xirap û qelsiyên sazûmanî ên di rêveberiyê de bi salan dirêj in dewam dikin, bandor li ser gel dike.
Niyaz Abdullah anî ziman ku ev rewş ne tenê pirsgirêkên hundirîn kûr dike, têkiliyên di navbera Hewlêr û hiqûmeta Iraqê de jî tevlîhevtir dike û bi lêv kir ku bi taybet geşedanên ku piştî referanduma 2017 hatin jiyankirin, cihê siyasî ya Herêma Kurdistanê qels kir û lihevnekirinên bi Bexdayê re tên jiyankirin, zêde kir.
Niyaz Abdullah bi bîr xist ku rexne hene ku beşeke girîng a mafên destûrî yên di çarçoveya federal de, nayên bicihanîn û destnîşan kir ku li dijî vê jî rêveberî û partiyên siyasî yên li herêmê berpirsyariyên xwe bi cih naynin, li şûna berjewendiyên neteweyî, berjewendiyên partiyê didin pêş û ev yek destkeftiyên li Başûr dixe xeteriyê.
Niyaz Abdullah destnîşan kir ku bandorên Tirkiye û Îranê li herêmê, lihevnekirinên bi Bexdayê re û parçebûna siyasî yên navxweyî, Herêma Kurdistanê dixe di bin zextekî piralî û diyar kir ku di encama vê rewşê de krîzên aborî kûr dibin, şert û mercên jiyanê yên gel girantir dibin û di nava nifşên ciwan de bêhêviyê zêde dikin.
Niyaz Abdullah diyar kir ku tevî van hemûyan jî tecrubeya siyasî, sazî, piştgiriya gel û têkiliyên navneteweyî yên Herêma Kurdistanê hîna jî wekî hêzekî girîng tê dîtin û destnîşan kir ku di serî de PDK û YNK’ê divê hemû hêzên siyasî hesabên teng ên partiyan berdin û bi berpirsyariya neteweyî tevbigerin.
Niyaz Abdullah anî ziman ku divê hemû parçeyên Kurdistanê û aktorên siyasî li dora stratejiyeke hevpar a neteweyî de bibin yek, têkiliyên dîplomatîk bên xurtkirin, pêvajoyên hilbijartinê bi awayekî tendurist bên meşandin û berjewendiyên neteweyî esas bên girtin. Niyaz Abdullah diyar kir ku bi taybet tevî ku bi ser hilbijartinan nêzî du sal derbas bûn jî hîna neavabûna hikûmetê hem zexta Bexdayê yê li ser Herêma Kurdistanê zêde dike û hem jî îradeya siyasî ya herêmê qels dike.
Niyaz Abdullah got ku ev rewş çareseriya pirsgirêkên navxweyî dereng dixe û bandoreke neyînî li ser baweriya gel a ji bo hikûmetê dike. Niyaz Abdullah diyar kir ku ji bo derbasbûna xitimîna siyasî ya heyî alî bi hişmendiya berpirsyariya neteweyî tevbigerin, berovajî vê dibe ku Herêma Kurdistanê hem li dijî zextên Bexdayê hem jî li dijî destwerdanên hêzên herêmî bikeve rewşekî hin hesastir.
