Ji bo Festîvala Jinan a Zîlan amadekarî li ber temambûnê ye ku îsal cara 21’emîn ji aliyê Meclîsa Jinan a Jiyan ve li paytexta Îngilistan Londonê tê lidarxistin. Festîval îsal bi dirûşma “Dem dema jinan e! Ji bo yekîtiyeke hîn xurt û paşerojeke wekhev û azad” di 28’ê Hezîrana 2026’an de li Albany Park, Bell Inn, Enfield EN3 5PA pêk tê.
Di festîvalê de ku wê di navbera saet 13:00 û 18:00 de were lidarxistin, wê gelek çalakiyên civakî û çandî bi ruhê têkoşîn, piştevanî û yekîtiya jinan bêne lidarxistin.
Di çarçoveya festîvalê de wê Lale Koçgun, Kewê û Olcay Bayir derkevin ser dikê. Parlamentera berê Sebahat Tûncel jî wê weke qiseker beşdarî festîvalê bibe. Li gel muzîkê di bernameya çandê de wê govend bê lîstin, pêşangeha ji kincên Kurd ên kevneşop were lidarxistin, teq werin nasandin, standên xwarinê bêne danîn û çalakiyên çandî yên cihêreng bêne lidarxistin.
Ji bo zarokan jî wê pêlîstokên boyaxkirina rû, lîstikên biçûk, nêçira xezîneyê, pêşbirka kîs, balon û aktîvîteyên cuda yên sporê wê hebin. Festîval li gel jinan wê ji bo zarokan û malbatên wan bibe qadeke kombûnê.
Di daxuyaniya Meclîsa Jinan a Jiyan de hate ragihandin ku festîval ne tenê çalakiyeke çandî ye, di heman demê de kombûneke girîng e ku têkoşîna hevpar û piştevaniya jinan mezin dike.
Meclîsa Jinan a Jiyan bang li jinan û dostan ên li Londonê û derdora wê dimînin kir ku 28’ê Hezîranê beşdarî Festîvala Jinan a Zîlan a 21’emîn bibin.
