Komîsyona Navendî ya Girtîgehan a Komeleya Mafên Mirovan (ÎHD), rapora xwe ya li ser Girtîgeha Tîpa S a Îdirê û sê girtîgehên li herêma rojhilatê Deryaya Reş eşkere kir. Di raporê de, hat diyar kirin ku di hevdîtinên bi girtiyan re gelek binpêkirinên mafan hatine tespîtkirin.
Şanda ÎHD’ê di navbera 22-24’ê Tîrmehê de li Girtîgeha Îdirê ya Tîpa S, Rîze Kalkandere ya Tîpa L, Trabzon Beşîkduzu ya Tîpa T û Gîresun Espiye ya Tîpa L’yê bi 26 girtiyan re hevdîtin kir û lêkolîn pêk anîn.
Di raporê de, hat gotin ku piraniya girtiyan ji malbatên xwe bi sedan kîlometre dûr tên girtin û daxwazên wan ên sewqkirina girtîgehên nêzî malbatên wan bê sedem tên redkirin. Her wiha hat diyar kirin ku nirxandinên “rewşa baş” ên Desteyên Îdarî û Çavdêriyê li ser hincetên çêkirî ne û ev yek dibe sedema derengketina berdana hinek girtiyan.
TENDURISTÎ Û LEGERÎN
ÎHD’ê, ragihand ku di sewqkirina nexweşxaneyan de gilî û gazincên li ser “lêgerîna di dev de”, “kelepçeya cot” û muayeneya bi kelepçe hene. Hat gotin ku hinek girtiyên ku van sepana nepejirandine nebirine nexweşxaneyê û mafê wan ê dermankirinê hatine astengkirin.
Di raporê de, hat gotin ku di derketina revîrê û sewqkirina nexweşxaneyan de derengmayînek heye û bi taybetî pirsgirêkên dermankirina didanan dewam dikin. Nêrîna hinek girtiyan ên ku di ketina girtîgehê de li ber lêgerîna tazî mane jî di raporê de cih girtin.
Hat diyar kirin, ku nameyên girtiyan tên sansûrkirin, hinek weşan nadin wan û di televîzyonan de tenê destûra kanalên ku îdare diyar dike tê dayîn.
PIRSGIRÊKÊN QAPASÎTEYÊ Û ÇALAKIYÊN CIVAKÎ
ÎHD’ê, diyar kir ku ji ber pirsgirêkên qapasîteyê hinek girtî neçar dimînin li erdê razên û girtina girtiyên ji komên cuda yên sûc di heman korîdoran de xeteriya ewlehiyê çêdike.
Hat ragihandin ku, çalakiyên qada hevpar, hobî û atolyeyan ji dema pandemiyê ve hatine kêmkirin an jî bi temamî hatine rawestandin; şopandina qadên hevpar a 24 saetan bi kamerayan jî ji bo mafê veşartîbûnê pirsgirêk e.
Komeleyê piştî raporê, bang kir ku xizmetên tenduristiyê bêne başkirin, sepanên lêgerînê bêne rawestandin, daxwazên sewqkirina girtîgehên nêzî malbatan bi pîvanên objektîf bêne nirxandin, çalakiyên civakî û çandî bêne zêdekirin û gihîştina rojname, kovar û pirtûkan misoger bibe.
ÎHD’ê, her wiha xwest ku sepanên înfazê yên di girtîgehan de li gorî pîvanên navneteweyî yên mafên mirovan bêne kirin û dawî li sepanên ku rûmeta mirovan birîn dikin, bê anîn.
