Partiya Herêmên Demokratîk (DBP) bi şîara “Em gotina aştiyê bi gel re ava dikin” li navçeya Tetwan a Bedlîsê bi rêxistinên civaka sivîl û welatiyan re civiya. Hevserokê Giştî yê DBP’ê Keskîn Bayindir jî tevlî civînê bû.
Bayindir di civînê de axivî û bal kişand ser girîngiya Pêvajoya Aştî û Civaka Demokratîk.
Bayindir diyar kir ku ev du sal in şer naqewime, ev tiştekî girîng e û got, meseleya Kurd ne tenê berdana çekan e, divê gelê Kurd weke qanûnî were naskirin û daxwazên wê yên statuyê bên nirxandin.
Bayindir îfade kir ku xebatên komîsyona li Meclîsê û qanûna çarçoveyê girîng in, lê belê ne têrker in û bang kir ku girtiyên siyasî bên berdan, ji bo vegera gerîlayan û kesên li dîasporayê sererastkirinên qanûnî pêk bên.
Bayindir bal kişand ser pirsgirêkên civakî û krîza aborî jî û bang kir ku ji bo aştî, azadî û wekheviyê têkoşîn hevpar bibe.
Bayindir di civîna gel a li gundê Avêtax a Tetwanê de jî axivî û got, “Êdî em ji bo çareseriyê hêzek in.”
Welatiyan jî di civînê de diyar kir ku ew ji Rêber Apo bawer dikin û bang kir ku ji bo pêşketina pêvajoyê, divê desthilatdarî gavên pêwîst bavêje.
Hat ragihandin ku DBP wê li gundên Şîrînşas û Siwarê jî civîna gel bidomîne.
