Partiya Wekhevî û Demokrasiyê ya Gelan (DEM Partî) ya Sêrtê bi daxwaza berdana girtiyên nexweş meşiya û daxuyanî da. Gelek nûnerên partiyên siyasî û saziyên civaka sivîl ên ku li ber avahiya partiyê hatin ba hev, heta Lîseya Sêrtê meşiyan.
Girseya ku pankarta wêneyê girtiyê nexweş Tuncer Saglam ê jiyana xwe ji dest dayî li ser bû û nivîsa “Ji girtiyên nexweş re azadî. Mafê dermankirinê yê girtiyên nexweş nayê astengkirin. Mafê jiyanê mafê mirovî ye” hebû hildan. Piştî meşê li ber Lîseya Sêrtê daxuyanî hat dayîn.
Hevserokê DEM Partiyê yê Sêrtê Kenan Bîlge daxuyanî xwend û diyar kir ku girtiyê nexweş Tuncer Saglam ê di 21’ê Nîsana 2025’an de li Wanê hatibû girtin, li Nexweşxaneya Etlîkê ya Enqereyê ya ku lê dihat dermankirin jiyana xwe ji dest daye. Bîlge bal kişand ser rewşa tenduristiyê ya Saglam û hewldanên ji bo berdana wî.
Bîlge destnîşan kir ku divê aştî û demokratîkbûn li ber deriyê girtîgehan bi dawî nebe û wiha got: “Divê bayê aştî û demokratîkbûnê pêşî di deriyê girtîgehan re derbas bibe. Divê girtîgeh nebin cihê bêdermankirinê û mirinan. Divê girtiyên nexweş demildest bên berdan û mafê wan ê jiyanê bê mîsogerkirin.”
