Cenazeyê kedkarê Çapemeniya Azad Aykol piştî merasîma bîranînê anîn Mizgefta Goristana Karşiyakayê. Li dû nimêja li ser cenaze darbesta Aykol li ser milên hempîşe, malbat û hezkiriyên wî birin goristanê.
Hate ragihandin ku Aykol wasiyet kiribû ku bi axa ji bajarê Kobanê bê veşartin, ku Kobanê bû sembola berxwedana li dijî DAÎŞ’ê.
Axa ku di çarçoveya vê wasiyetê de ji Kobanê hatibû anîn, li ber ala sor û qurnefîlan li ser gora Aykol hate reşandin.
Hevserokê Giştî yê DEM Partiyê Tûncer Bakirhan, aktîvîsta TJA’yê Sebahat Tûncel, heval û dostên Aykol qurnefîl danîn ser gora wî.
ŞEHÎDÊ ÇAPEMENIYA AZAD
Hevserokê Komeleya Rojnamevanan a Dîcle Firatê (DFG) Selman Çîçek li ser gora Aykol axivî û Aykol weke “Şehîdê Çapemeniya Azad” pênase kir. Çîçek got, “Weke Apê Mûsa, weke Gûrbetellî Ersoz şehîdê Çapemeniya Azad e. Mamoste Huseyîn namire.”
Piştî axaftinê dirûşma “Şehîd namirin” hate qîrîn û pankarta bi nivîsa “Çinara şoreşger a çapemeniya azad” hate hildan.
Serdanên sersaxiyê yên ji bo Aykol wê ji îro û pê ve li Şaxê Enqereyê yê Komeleya Mafên Mirovan (ÎHD) ji aliyê malbat û hevalên wî ve bêne qebûlkirin.
