Rêxistina Partiya Herêmên Demokratîk (DBP) a Sêrtê, 2’yemîn Kongreya Asayî li dar xist. Kongre, li eywaneke dawetan a bajar hat lidarxistin.
Li eywanê pankartên “Em xwe li ser xeta hevrêtiya komunal birêxistin dikin”, “Niha dema jinê ye” û “Sosyalîzm bêyî azadiya jinê nabe” hatin daliqandin. Nûnerên partiyên siyasî, rêxistinên civaka sivîl, Hevserokê Giştî yê DBP’ê Keskîn Bayindir û gelek partiyî tev li bûn.
Kongre, bi deqeyek rêzgirtinê dest pê kir. Piştre jî Hevserokê DBP’a Sêrtê Mûstafa Dayanan axivî û got hêzên li Rojhilata Navîn hewl didin mafên gelê Kurd xesp bikin. Dayanan, wiha domand: “Tekane rêya xelasiya ji vê rewşê ew e ku em paradîgmaya Rêberê Gelê Kurd Abdullah Ocalan bidin jiyîn. Hewceye em xw di her qadê de birêxistin bikin. Ev yek, berpirsyartiya me ya dîrokî ye.” Wekîla DEM Partiyê ya Sêrtê Sebahat Erdogan Saritaş jî bi bîr xist ku bi ser banga 27’ê Sibatê re gelek dem derbas bûye û berpirsyartî dikeve ser milê her kesî.
‘DIVÊ ÇARESERÎ DI ÇARÇOVEYEKE HIQÛQÎ DE BE’
Hevserokê Giştî yê DBP’ê Keskîn Bayindir jî bal kişand ser pêvajoyê û ev tişt anî ziman: “Em dixwazin çareseriya pirsgirêka Kurd, di çaçroveya destûra bingehîn û çarçoveyekî qanûnî de bê çareserkirin. Hemû armanc û xebata me ji bo vê ye.” Bayindir, got Dayikên Aştiyê tevî pirsgirêkan jî ji bo aştiyê çûne Enqere, Gemlîk, Stenbol û hemû bajrên Kurdistanê û wiha pê de çû: “Lêbelê muxatabê din ê vê pêvajoyê, anku dewlet û îktîdar vê pêvajoyê ji hêla exlaqî ve baş bi kar nayîne. Bi zelalî nêzî pêvajoyê nabin. Hewldaneke wan a ji bo pêvajoyê li ser zemîna hiqûqî bidomînin nîne û hêjta nexşerêyeke wan jî nîne. Ev yek jî zorê dide pêvajoyê û rê li ber şikestinan vedike. Hêj ji destpêkê ve birêz Ocalan û pêşengên Kurdan gotin gel dikare vê pêvajoyê birêve bibe. Gelê daxwaza aştî û azadiyê dike pêşengê vê pêvajoyê ye. Ew îradeya me heye ku em ji bo aştî û azadiyê gav bi wan bidin avêtin. Gavê hewceye bên avêtin jî diyar in. Hûn ji kê jî bipirsin, dê ji we re bibêjin hewceye kîjan gav bên avêtin.
DAXWAZÊN GELÊ KURD
Gelê Kurd daxwaza naskirina ziman, huner, çand û hebûna xwe dike. Daxwaza hemwelatiya wekhev dike. Muxatabê vê pêvajoyê Rêberê Gelê Kurd Abdullah Ocalan e. Ji bo pêşveçûna vê pêvajoyê û bidawîbûna polîtîkayên înkarê, hewce dike statuya Rêberê Gelê Kurd diyar bibe. Statuya Rêberê Gelê Kurd, statuya gelê Kurd û Kurdistanê ye. Ev, girêdayî hev in. Polîtîkayên tecrîdê yên tên meşandin, dê rê li ber pêşketinê venekin.”
Piştî axaftinan, bi yek lîsteyê hilbijartin hate kirin. Di hilbijartinê de Saîre Eren Bîlmîş û Emîn Dayan bûn Hevserokên DBP’a Sêrtê.
Kongre, bi gerandina govendê bi dawî bû.
